«Hienpłan Minska — antynarodny, zaćviardžać jaho ŭ takim vyhladzie nielha» — takoje mierkavańnie vykazaŭ 19 listapada na pres-kanfierencyi ŭ Minsku staršynia arhkamiteta hramadskaha abjadnańnia «Ekahrad» Viktar Jančurevič. Jaho padtrymali i členy inicyjatyŭnych hrup žycharoŭ horada, jakija prysutničali na joj.
Nahadajem, pieršapačatkova hramadskaje abmierkavańnie, jakoje pačałosia 14 kastryčnika, płanavałasia zaviaršyć 5 listapada. Potym abmierkavańnie było pradoŭžanaje pa 13 listapada.
«My prapanujem dapracavać hienpłan i vynieści jaho na paŭtornaje hramadskaje abmierkavańnie», — adznačyŭ Jančurevič.
Na jaho dumku, uvioŭšy ŭ hienpłan takija novyja terminy, jak «detalizacyja i ŭdakładnieńnie rehłamientaŭ hienieralnaha płana» i «ŭnikalnyja abjekty staličnaha ŭzroŭniu», tym samym «ułady raźviazali ruki». «Faktyčna Minharvykankam naviazvaje praviły hulni, pry jakich praviłaŭ niama. Detalizujučy i ŭdakładniajučy rehłamienty na stadyi detalovych prajektaŭ, jany mohuć ich źmianiać, a prapanujučy da budaŭnictva ŭnikalnyja dla horada abjekty, dazvalajuć sabie nie vykonvać nijakija rehłamienty pa asvajeńni zon, na jakich jany źbirajucca ich budavać», — ličyć aktyvist.
Jon taksama adznačyŭ, što hienpłan parušaje i zajaŭlenyja abjomy žyllovaha budaŭnictva, zamiest 600 tys. kv. mietraŭ u hod zakładvajecca ŭ siarednim prykładna 1 młn. kv. mietraŭ. «Uličvajučy, što Minsk nie płanujecca budavać za miežami MKAD, heta aznačaje ŭščylnieńnie isnaj zabudovy i znos pryvatnaha siektara ŭ značna bolšym abjomie, čym heta zajaŭlena ŭ hienpłanie», — ličyć aktyvist.
Jančurevič upeŭnieny, što znos pryvatnaha siektara i ŭščylnieńnie isnaj zabudovy budzie aznačać skaračeńnie i źniščeńnie zialonych zon.
«Na samaj spravie novy hienpłan raspracavany nie dla žycharoŭ, nie ŭ ich intaresach, a ŭ intaresach vyklučna budaŭničaha siektara, zadavalnieńnia jaho intaresaŭ. A heta adbivajecca na navakolnym asiarodździ, na zdaroŭi žycharoŭ», — ličyć Jančurevič.
Dla vyrašeńnia vyšejpaznačanych prablem inicyjatyŭnyja hrupy žycharoŭ prapanujuć stvaryć hramadski horadabudaŭničy saviet pry staršyni Minharvykankama. Jak paviedamiŭ Jančurevič, adpaviednaja prapanova budzie pieradadziena siońnia staršynie Minharvykankama Andreju Šorcu.
«Dla taho kab u dalejšym nie ŭźnikała prablem u śfiery horadabudaŭnictva i nahniatańnia hramadskaj napružanaści, treba, kab hienpłan Minska stvaraŭsia nie prosta ŭ majsterni «Minskhrada», a naradžaŭsia padčas dyjałohu ŭłady horada, śpiecyjalistaŭ, architektaraŭ, prajekciroŭščykaŭ i hramadskaściu. My, žychary horada, pavinny ŭdzielničać u raźvićci stalicy niepasredna», — ličyć Jančurevič.
Jon nahadaŭ, što Šorac, zastupajučy na pasadu, źviartaŭsia da žycharoŭ z prośbaj bolš aktyŭna ŭdzielničać u žyćci horada i prapanavać inicyjatyvy. «Siońnia my chočam prapanavać stvaryć pry staršyni Minskaha haradskoha vykanaŭčaha kamiteta hramadski horadabudaŭničy saviet. Mienavita hramadski, tamu što architekturna-horadabudaŭničy saviet sa śpiecyjalistaŭ jość, niama hramadskaj struktury, jakaja mahła b strymlivać i kantralavać pracu ŭsich tych, chto zajmajecca płanavańniem raźvićcia horada. Takaja struktura na siońnia vielmi nieabchodnaja», — ličyć aktyvist.
Taksama prapanujecca stvaryć arhkamitet z pradstaŭnikoŭ inicyjatyŭnych hrup žycharoŭ i arhanizavać sustreču z pradstaŭnikami arhkamiteta i ŚMI, kab abmierkavać mahčymaści i šlachi realizacyi hetaj inicyjatyvy.
Realizacyja prava fizičnych asob na spryjalnaje asiarodździe pražyvańnia praduhledžvaje ich udzieł u horadabudaŭničym płanavańni raźvićcia nasielenych punktaŭ i ažyćciaŭleńni architekturnaj, horadabudaŭničaj i budaŭničaj dziejnaści. Hetaje pałažeńnie artykuła 4 zakona ab architekturnaj, horadabudaŭničaj i budaŭničaj dziejnaści pryvodzicca ŭ jakaści arhumienta ŭ prapanovie.
Pad prapanovaj padpisalisia: Viktar Jančurevič, pradstaŭniki inicyjatyŭnych hrup vulicy Viljamsa, parku 40-hodździa Kastryčnika, Uručča-2, vulicy Kirava («Varoty Minska»), vulicy R. Luksiemburh, Sielhaspasiołka, praśpiekta Niezaležnaści, 109, vulicy Vaśniacova, mikrarajona Asmałoŭka.
