Na hetym tydni kiraŭnik spravami prezidenta Biełarusi Viktar Šejman naviedaŭ Zimbabve i pravioŭ pieramovy z prezidentam hetaj afrykanskaj krainy, paviedamlajuć miascovyja ŚMI. Jany nazyvajuć Šejmana vyklučna «hienierałam» i «pasłańnikam Alaksandra Łukašenki».
Klučavymi stali pieramovy za začynienymi dźviaryma Šejmana z prezidentam Robiertam Muhabe ŭ jaho rezidencyi ŭ Charare (stalica Zimbabve).
Baki abmierkavali «šyrokaje koła pytańniaŭ, jakoje adnosicca da dalejšaha raźvićcia adnosinaŭ pamiž dźviuma krainami ŭ halinie budaŭnictva transpartnaj infrastruktury, navučańnia piersanału, zdabyčy karysnych vykapniaŭ i pastavak abstalavańnia i techniki dla sielskaj haspadarki i pramysłovaści».
Viktar Šejman pieradaŭ Muhabe zaprašeńnie naviedać Biełaruś u krasaviku nastupnaha hoda.
«My abmierkavali pytańni supracoŭnictva ŭ halinie elektraenierhietyki, budaŭnictva daroh, damoŭ i mastoŭ. Akramia taho, byli abmierkavany mahčymaści navučańnia zimbabvijskich studentaŭ u mnohich univiersitetach Biełarusi. My źbirajemsia pašyryć dvuchbakovaje supracoŭnictva», — skazaŭ Šejman pa vynikach pieramovaŭ.
Zrešty, adnym z klučavych pytańniaŭ było vykanańnie bujnoha kantraktu na pastaŭku ŭ Zimbabve biełaruskaj techniki. U chodzie vizitu vice-prezidenta Zimbabve Emiersana Mnanhahvy ŭ Biełaruś u lipieni abmiarkoŭvałasia mahčymaść pastaŭki techniki MAZ, MTZ, «Amkador», BiełAZ na ahulnuju sumu 150 młn dalaraŭ. «U bližejšy čas budzie padpisany kantrakt. Akramia pastaŭki mašyn, my stvorym tut servisny centr, vyvučym miascovych śpiecyjalistaŭ pracy ź biełaruskaj technikaj», — skazaŭ Šejman.
Akramia taho, padčas vizitu Zimbabve i Biełaruś padpisali pahadnieńnie ab stvareńni sumiesnaha pradpryjemstva pa zdabyčy zołata. U adpaviednaści z damovaj Biełaruś budzie pastaŭlać horna-šachtavaje abstalavańnie ŭ hetuju afrykanskuju krainu i zabiaśpiečvać asvajeńnie ŭčastka z pryrodnymi vykapniami.
Varta adznačyć, što Viktaru Šejmanu, jaki znachodzicca pad sankcyjami Jeŭrasajuza, daručana vybudoŭvać adnosiny ź niekatorymi łacinaamierykanskimi krainami, u pryvatnaści, Vieniesuełaj i Balivijaj. U pieršaj krainie jon atrymaŭ pośpiech, za što Uha Čavies uznaharodziŭ Šejmana ordenam «Zorka Karaboba».
***
Zimbabve — adna z samych biednych krain Afryki i kraina z samaj vysokaj aficyjna zafiksavanaj inflacyjaj. Z-za taho, što zimbabvijski dalar nieadnarazova devalvavaŭsia (u 2008 hodzie ŭ zvarot pastupiła banknota naminałam u 100 tryljonaŭ dołaraŭ), u krasaviku chadžeńnie nacyjanalnaj valuty było spyniena. Žychary krainy z tych časoŭ raspłačvajucca dalarami ci valutami susiednich dziaržaŭ z bolš stabilnymi ekanomikami. Robiert Muhabe ŭžo 35 hadoŭ kiruje krainaj.
