Ilustracyjnaje fota
Pra zdareńnie raspaviała staršaja śledčaja Vałožynskaha rajadździeła Śledčaha kamiteta Aksana Hulba.
Vałožynski rajvykankam daŭ u arendu adnamu z kałhasaŭ voziera, kab vyroščvali ŭ im rybu na prodaž. Hetaje voziera złučanaje kanałam ź inšym vozieram. Jany adździelenyja dambami, i ryba adnaho voziera nie traplaje ŭ druhoje.
Uviečary 4 listapada rybak z Vałožynščyny pryjšoŭ na voziera i staŭ vudzić rybu na śpininh. Sprava išła pavolna, i jon vyrašyŭ dziejničać pa-inšamu.
Adkryŭ haječnym klučom šluz i staŭ čakać, pakul vada z voziera z rybaj, jakuju vyroščvajuć na prodaž, pieraciače ŭ druhoje voziera.
Praź dźvie hadziny ŭžo možna było prosta chadzić i źbirać rybu ŭ miachi, što i zrabiŭ rybak. Adnak kali ŭbačyŭ fary mašyny, što prajazdžała mima, to vyrašyŭ źbiehčy. Spačatku schavaŭsia ŭ kustach, a potym pabieh damoŭ.
Jak akazałasia, heta była mašyna milicyi. Supracoŭniki jakraz jechali na hetyja aziory. Im pazvanili zaniepakojenyja miascovyja žychary, jakija zaŭvažyli, što ŭ adnym voziery raptam stała chutka padnimacca vada.
Rybaka zatrymali. Jamu pahražaje da troch hadoŭ turmy.
20 listapada spravu nakiravali ŭ sud.
Staršaja śledčaja Aksana Hulba zaŭvažaje, što kałhas, jaki arandavaŭ voziera, nie pakłapaciŭsia ni pra aśviatleńnie terytoryi, ni pra toje, kab naniać achoŭnika, ni pra papieradžalnuju tabličku, što ŭ voziery vudzić nielha. Kałhasu ŭkazali na hetyja rečy i raili ich vypravić.