Ułady Bielhii źnizili ŭzrovień terarystyčnaj pahrozy z vyšejšaj čaćviortaha da bolš umieranaha treciaha, paviedamlajuć ŚMI krainy.
Horad byŭ błakavany amal tydzień, na praciahu jakoha nie pracavali škoły, univiersitety i mietrapaliten, a vulicy patrulavali vajskoŭcy.
Pavyšeńnie ŭzroŭniu terarystyčnaj niebiaśpieki da čaćviortaha było vyklikana tym, što padazravanyja ŭ arhanizacyi niekalkich kryvavych napadaŭ u Paryžy byli źviazanyja z Brusielem.
Pa mienšaj miery adzin z padazravanych va ŭdziele ŭ rasstrele mirnych ludziej u Paryžy, Sałach Abdelsałam, zastajecca pakul na voli. Paviedamlajecca, što jon žyŭ u Brusieli niekalki hadoŭ.
Ciapier uzrovień pahrozy ŭ stalicy taki ž, jak i ŭ inšych častkach Bielhii.
U čaćvier pažarnyja i śpiecyjalisty pa dezaktyvacyi pravieryli bujnuju miačeć u Brusieli, paśla taho, jak tam byŭ znojdzieny padazrony parašok. Rečyva akazałasia mukoj, a nie sporami sibirskaj jazvy, jak aścierahalisia pieršapačatkova.
Palicyja praviała sieryju rejdaŭ i pieratrusaŭ u roznych častkach Bielhii za apošnija dva tydni. Piaciarym asobam pradjaŭlenyja abvinavačvańni ŭ pravaparušeńniach, źviazanych z terarystyčnaj dziejnaściu.
Čarhovy rejd mieŭ miesca ŭ Sambiervili, miastečku ŭ 80 kiłamietrach na poŭdzień ad Brusiela. Pra zatrymańni padčas rejdu nie paviedamlajecca.
