Padčas prachodu zaŭziataraŭ na futbolnyja matčy pradstaŭniki fiederacyi pa hetym vidzie sportu buduć vieści «niezaležnuju videazdymku», paviedamiŭ pieršy namieśnik staršyni BFF Siarhiej Safarjan na pres-kanfierencyi 30 listapada ŭ Minsku.
Pavodle jaho słoŭ, heta miera zaklikana źnizić kolkaść kanfliktnych situacyj i sadziejničać ab`iektyŭnamu vyrašeńniu sprečak pamiž hledačami i supracoŭnikami milicyi.
Ab damoŭlenaści z MUS nakont prysutnaści pradstaŭnikoŭ BFF na ŭvachodach raniej užo paviedamlałasia. Ciapier adbyłasia kankretyzacyja ich abaviazkaŭ.
Jak zajaviŭ Safarjan, instytut ściuardaŭ na stadyjonach budzie ŭvodzicca pastupova, u zaležnaści ad hatoŭnaści piersanału. Nadhladnyja ž mierapryjemstvy pa pierymietry aren pa-raniejšamu budzie pravodzić milicyja, bo lubuju inšuju — nie siłavuju — strukturu zakanadaŭstva nie ŭpaŭnavažnaje zajmacca hetym. «Z pytańniami biaśpieki nichto žartavać nie źbirajecca», — padkreśliŭ pradstaŭnik BFF. U toj ža čas, skazaŭ jon, z supracoŭnikami MUS, jakija ažyćciaŭlajuć nadhlad, budzie pravodzicca «adpaviedny instruktaž», bo «na pieršy płan vychodziać pytańni čałaviečaha faktaru».
Milicyja pradoŭžyć supravadžeńnie zaŭziataraŭ na matčy, adnak fiederacyja, pavodle słoŭ Safarjana, uzdymie pytańnie pavodzin supracoŭnikaŭ MUS. «Užo paśla sustrečy kiraŭnictva fiederacyi i MUS (11 listapada) była nie vielmi pryjemnaja situacyja padčas pajezdki zaŭziataraŭ z Hrodna ŭ Minsk na matč kubka. U bolšaj stupieni heta tyčycca DAI, a nie AMAPa», — adznačyŭ jon.
