Žychary Hamburha ŭ chodzie refierendumu 29 listapada prahałasavali suprać praviadzieńnia ŭ horadzie Letnich alimpijskich hulniaŭ u 2024 hodzie, paviedamiŭ mer horada Ołaf Šolc.
Suprać praviadzieńnia Hulniaŭ vykazalisia amal 51,7% z 650 tysiač udzielnikaŭ refierendumu.
U baraćbie za praviadzieńnie letniaj Alimpijady 2024 hoda ŭdzielničajuć Łos-Andželes, Rym, Paryž i Budapiešt. Kančatkovy pieramožca budzie abrany ŭ 2017 hodzie.
«Narod Hamburha pryniaŭ rašeńnie, i Hamburh nie budzie zmahacca za prava praviadzieńnia Alimpijskich i Paraalimpijskich hulniaŭ u 2024 hodzie, — zajaviŭ Šolc. — Sienat i ja asabista chacieli b bačyć inšy vynik, ale jon zrazumieły».
Prajekt praviadzieńnia Alimpijady ŭ Hamburhu aceńvaŭsia ŭ 7,4 młrd jeŭra.
U 2013 hodzie žychary inšaha hiermanskaha horada — Miunchiena — taksama na refierendumie vykazalisia suprać praviadzieńnia ŭ horadzie Zimovych alimpijskich hulniaŭ 2022 hoda.
Rašeńnie žycharoŭ Hamburha moža stać udaram pa Mižnarodnym Alimpijskim kamitecie, jaki letaś prahałasavaŭ za realizacyju prahramy reformaŭ, što zrobiać praviadzieńnie Alimpijskich hulniaŭ bolš pryvabnym dla haradoŭ.
U apošnija hady harady ŭsio čaściej admaŭlajucca ad zajavak na praviadzieńnie Alimpijskich hulniaŭ. Ad zajavak na praviadzieńnia hulniaŭ u 2022 hodzie, akramia Miunchiena, admovilisia Osła, Davos i inšyja harady. U vyniku hulni projduć u Piekinie.
U apošni raz Alimpijskija hulni ŭ Hiermanii pravodzilisia ŭ 1972 hodzie ŭ Miunchienie.
