Studentaŭ fiłfaka BDU sklikali na kamisiju ŭ dekanat fakulteta. Terminovaja sustreča była pryznačanaja na nastupny dzień paśla «Marša studentaŭ».
Vyklikali ŭsich studentaŭ, jakija majuć prapuščanyja zaniatki, adnak maładziony pierahavorvajucca, što sapraŭdnaja pryčyna zboru — historyja ich adnakurśnika Hleba Vajkula.
Nahadajem, padčas «Marša studentaŭ» u dačynieńni studenta fiłfaka BDU Hleba Vajkula byŭ składzieny pratakoł za parušeńnie paradku praviadzieńnia masavych mierapryjemstvaŭ.
Kamisija była pryznačanaja na 15:45, doŭžyłasia kala dźviuch hadzin. Studentaŭ zaprašali ŭ kabiniet pa dvoje-troje.
Pa vyniku ŭsich vyklikanych studentaŭ paprasili napisać tłumačalnyja zapiski pra pryčyny propusku zaniatkaŭ, a taksama zrabili im tak zvanuju «zaŭvahu dekana».
Adznačym, što zaŭvaha — reč mienš surjoznaja za vymovu, i moža mieć značeńnie tolki ŭ vypadkach typu zasialeńnia ŭ internat.
Hleb Vajkul taksama napisaŭ tłumačalnuju zapisku ab propusku 92 akademičnych hadzin, ale, pa jaho słovach, jaje navat nie čytali. Propuski zaniatkaŭ student patłumačyŭ tym, što vymušany byŭ zdavać akademičnuju roźnicu pry pierachodzie z płatnaj formy navučańnia na biudžetnuju i nie paśpiavaŭ sumiaščać zaniatki z ekzamienami.
