Ekstremisty z hrupoŭki «Isłamskaja dziaržava» zarabili bolš za 500 miljonaŭ dalaraŭ na prodažy nafty, zajaviŭ u piatnicu Adam Zubin, namieśnik ministra finansaŭ ZŠA, jaki adkazvaje ŭ viedamstvie za baraćbu z teraryzmam i finansavuju vyviedku.
U adroźnieńnie ad astatnich hrupovak, pryznanych terarystyčnymi, ID nie zaležyć ad finansavańnia z boku mižnarodnych sponsaraŭ, a sama «zarablaje» hrošy, padkreśliŭ jon.
«Asnoŭnym klijentam» ID źjaŭlajecca ŭrad prezidenta Siryi Bašara Asada, skazaŭ Zubin u intervju Bi-bi-si.
Pavodle jaho słoŭ, miarkujučy pa ŭsim, prodaž nafty režymu Asada, a taksama klijentam u Turcyi prynosić bajevikam kala 40 miljonaŭ dalaraŭ u miesiac.
«Abodva baki sprabujuć źniščyć adzin adnaho i adnačasova handlujuć adzin z adnym na miljony i miljony dalaraŭ», — skazaŭ čynoŭnik amierykanskaha viedamstva.
Akramia taho, pavodle dadzienych ZŠA, hrupoŭka «Isłamskaja dziaržava» skrała kala miljarda dalaraŭ z bankaŭ na padkantrolnaj im terytoryi.
Pavodle vynikaŭ daśledavańnia, praviedzienaha brytanskaj kansałtynhavaj kampanijaj IHS, ID «zarablaje» kala 80 miljonaŭ dalaraŭ u miesiac, u asnoŭnym ad prodažu nafty. Akramia taho, hrupoŭka atrymlivaje hrošy ad padatkaŭ, što spahaniajucca na padkantrolnaj joj terytoryi, a taksama ad nielehalnaha handlu pradmietami daŭniny, prodažu elektraenierhii, vykradańniaŭ ludziej i prosta rabavańnia.
Kaalicyja, jakuju ŭznačalvaje ZŠA, nanosić avijaŭdary pa pazicyjach ID, u tym liku i pa naftapramysłovych abjektach u Siryi i Iraku. Nie tak daŭno siły kaalicyi prystupili da kampanii pad kodavaj nazvaj «Pryliŭnaja chvala-2», u ramkach jakoj jany nanosiać masiravanyja ŭdary pa naftaradoviščach, naftapierapracoŭčych zavodach i tankierach na terytoryi, padkantrolnaj ID.
Kaalicyja ličyć adnoj sa svaich metaŭ adrezać ID ad krynic dachodaŭ, skazaŭ Zubin.
