U minskim hateli «Viktoryja» 12 śniežnia prajšoŭ čarhovy ŭstanoŭčy źjezd pa stvareńni partyi «Biełaruskaja chryścijanskaja demakratyja».
Jak adznačyŭ sustaršynia arhkamiteta BCHD Pavieł Sieviaryniec, u pracy źjezda ŭziali ŭdzieł 56 delehataŭ, kožny ź jakich pradstaŭlaje pa 20 zasnavalnikaŭ. Takim čynam, nieabchodnaja kolkaść zasnavalnikaŭ dla rehistracyi partyi — tysiača čałaviek — dasiahnutaja, udakładniŭ jon.
Na źjeździe zaćvierdžanyja aficyjnaja nazva partyi, jaje prahrama i statut, abrany skład nacyjanalnaj rady BCHD.
Pakiet dakumientaŭ na rehistracyju partyi ŭ Ministerstva justycyi płanujecca padać užo na nastupnym tydni, skazaŭ Sieviaryniec.
Delehaty źjezda taksama pryniali rezalucyju, u jakoj pryznali prezidenckija vybary, što prajšli ŭ Biełarusi ŭ 2015 hodzie, sfalsifikavanymi. Dakumient pryniaty na asnovie materyjałaŭ kampanii naziralnikaŭ «Prava vybaru — 2015».
U druhoj rezalucyi — «Za svabodnyja i spraviadlivyja vybary» — členy arhkamiteta BCHD zaklikali ŭłady ŭnieści źmieny ŭ vybarčaje zakanadaŭstva, zarehistravać usie demakratyčnyja abjadnańni i partyi, jakim z-za nadumanych pryčyn admaŭlali ŭ rehistracyi, stvaryć roŭnyja ŭmovy dziejnaści dziaržaŭnych i niedziaržaŭnych ŚMI. «My taksama źviartajemsia da ŭsich mižnarodnych partnioraŭ z prapanovaj naŭprost źviazać pytańnie ab poŭnym źniaćci vizavych i finansavych abmiežavańniaŭ u dačynieńni da biełaruskich čynoŭnikaŭ sa źmienaj Vybarčaha kodeksa i praviadzieńniem sumlennych, svabodnych parłamienckich vybaraŭ u 2016 hodzie», — skazana ŭ rezalucyi.
Arhkamitetu BCHD było admoŭlena ŭ rehistracyi partyi piać razoŭ. Pieršy ŭstanoŭčy źjezd partyi prajšoŭ u 2009 hodzie, u 2010-m — jašče dva. Čaćviortaja sproba rehistracyi partyi była zroblenaja ŭ śniežni 2011-ha, a piaty ŭstanoŭčy źjezd adbyŭsia 3 červienia hetaha hoda.
Raniej chryścijanskija demakraty zajaŭlali pra namier padać zajaŭku na ŭklučeńnie ŭ Knihu rekordaŭ Hinesa pa kolkaści admoŭ u rehistracyi.
