Ruch «Za Svabodu», Abjadnanaja hramadzianskaja partyja (AHP) i arhkamitet pa stvareńni partyi «Biełaruskaja chryścijanskaja demakratyja» (BCHD) zajavili ab stvareńni placoŭki dla sumiesnaj pracy.
«Na siońnia my možam havaryć ab stvareńni jak minimum placoŭki dla sumiesnaj pracy», — skazaŭ staršynia AHP Anatol Labiedźka 13 śniežnia ŭ Minsku na sumiesnaj pres-kanfierencyi ź pieršym namieśnikam staršyni ruchu «Za Svabodu» Juryjem Hubarevičam i sustaršynioj arhkamiteta BCHD Vitalom Rymašeŭskim.
«My mahli b havaryć i ab kaalicyi, ale viedajem, nakolki hetaje paniaćcie ŭ apošni čas devalvavałasia, — dadaŭ Labiedźka. — Tamu nie budziem śpiašacca, chacia vy možacie nazyvać nas jak zaŭhodna. Sprava ciapier nie ŭ naźvie, a ŭ tym, što my budziem rabić siońnia, zaŭtra i paślazaŭtra. Tamu heta — placoŭka dla sumiesnaj pracy, jakaja moža vyjści na stvareńnie surjoznaj kaalicyi, jakaja svaimi spravami dakaža, što jana kaalicyja».
Rymašeŭski sa svajho boku adznačyŭ, što na siońnia ŭ pradstaŭnikoŭ nazvanych struktur jość kankretnyja damoŭlenaści ab stratehičnym supracoŭnictvie na najbližejšyja palityčnyja kampanii, a taksama damoŭlenaści, jakija tyčacca sumiesnaj pazicyi pa mižnarodnych pytańniach i sumiesnaha nazirańnia za parłamienckimi vybarami. Rymašeŭski taksama vykazaŭ mierkavańnie, što takoje abjadnańnie niavyhadnaje biełaruskim uładam.
U siaredzinie listapada ŭ Brusieli arhkamitet BCHD, ruch «Za Svabodu», AHP i Partyja BNF padpisali dekłaracyju ab kaardynacyi dziejańniaŭ, jakaja praduhledžvaje ŭ tym liku farmiravańnie adzinaha śpisa kandydataŭ u deputaty na parłamienckich vybarach 2016 hoda. Adnak potym Partyja BNF admoviłasia ad udziełu ŭ kaalicyi i zajaviła ab namiery iści na vybary svaim śpisam kandydataŭ.
