Šeść demakratyčnych struktur padpisali pahadnieńnie pra ŭdzieł u sumiesnaj kampanii nazirańnia za parłamienckimi vybarami 2016 hoda, paviedamlaje pres-słužba arhkamiteta pa stvareńni partyi «Biełaruskaja chryścijanskaja demakratyja».
Dakumient akramia BCHD padpisali ruch «Za Svabodu», Partyja BNF, Biełaruskaja sacyjał-demakratyčnaja partyja (Hramada), Abjadnanaja hramadzianskaja partyja i Prafsajuz rabotnikaŭ radyjoelektronnaj pramysłovaści (REP).
«Abjadnańnie demakratyčnych sił i sumiesnyja dziejańni — adna z našych stratehičnych zadač, — adznačyŭ sustaršynia BCHD Vital Rymašeŭski. — Biełaruskija ŭłady štoraz imknucca da lehalizavańnia svajoj dziejnaści praz vybarčyja pracesy, ale naziralniki pakazvajuć ich nieadpaviednaść demakratyčnym normam. My budziem damahacca prava na sumlennyja i prazrystyja vybary z realnym padlikam hałasoŭ».
«Kab rabić niejkija vysnovy adnosna taho, ci byli vybary spraviadlivymi, prazrystymi i demakratyčnymi, treba mieć naziralnikaŭ, jakija buduć sačyć za chodam vybaraŭ, — skazała staršynia BSDP (Hramada) Iryna Vieštard. — Pakul ja, na žal, nie bačyła za ŭvieś čas svajho nazirańnia pravilnaha i prazrystaha padliku hałasoŭ vybarščykaŭ. Nazirańnie daje mahčymaść sabrać faktyčny materyjał ab tym, nakolki demakratyčnymi, spraviadlivymi i prazrystymi byli vybary, i na padstavie hetaha rabić adpaviednyja vysnovy».
Parłamienckija vybary ŭ 2016 hodzie projduć nie paźniej za 11 vieraśnia.
