Mnohija jaje nie pieranosiać, inšyja vyśmiejvajuć za jaje školny vyhlad, a niekatoryja platkarać pra jaje, kažučy, što nibyta ŭ jaje luboŭnaja suviaź z bojkim starejučym šef-redaktaram radyjostancyi «Echo Moskvy» Alaksiejem Vieniadziktavym. Vidać, usio heta niapraŭda. Žurnalistka Lesia Rabcava, miarkujučy pa ŭsim, była daśviedčanaj špijonkaj.
ria.ru
U adnu z apošnich svabodnych radyjostancyj, što viaščajuć na ŭsiu Rasiju, «Echo Moskvy», Rabcavu nibyta zasłali śpiecyjalna dla raźviedvańnia važnaj infarmacyi ŭ nietrach hetaha vielmi papularnaha srodku masavaj infarmacyi, jaki ličycca «hałosnaj truboj» rasiejskaj apazicyi.
Akramia taho, zadačaj Lesi było raskładać znutry raniej zhurtavany kalektyŭ «Echa», unikalnuju kamandu ŭ asiarodździ rasijskich ŚMI, jakim peŭnaja svaboda dazvalajecca ŭžo tolki ŭ internecie. I z toj, i z druhoj zadačaj Lesia spraviłasia bliskuča. Pa mienšaj miery tak śćviardžajuć tyja, chto davieryŭ joj misiju.
Apieracyja «Cik-Tak»
Hałoŭnym ideołaham prajekta «Lesia», imavierna, byŭ viadomy rasijski pradziusar, były deputat Dziaržaŭnaj Dumy Kanstancin Rykaŭ. Jon navat raspavioŭ, što kodavaj nazvaj apieracyi było nie imia «Lesia», a «Cik-Tak». Niahledziačy na toje, što paśla Rykaŭ zajaviŭ, što jaho raniejšyja śćviardžeńni — niapraŭda, usio, što ŭ apošnija dni robić Rabcava, hraje na ruku Kramlu. Navat kali praŭradavyja siły nie pryciahvali Lesiu da brudnaj pracy, tak ci inakš jana jaje vykanała.
Na stancyi «Echo Moskvy» Lesia źjaviłasia ŭ 2011 hodzie. Nieŭzabavie jana stała pravaj rukoj samoha viadomaha i najstarejšaha šef-redaktara fiederalnaha ŚMI Alaksieja Vieniadziktava. Joj dastavałasia šmat času ŭ efiry, i słuchačam jana zapomniłasia zdolnaściu krytykavać, čaściakom bałansujučy na miažy chamstva. Bolš stałyja kalehi admaŭlalisia ź joj pracavać. Pałova pieršapačatkovaha kalektyvu «Echa» pasvaryłasia z-za jaje ź Vieniadziktavym. Niekatoryja zvolnilisia. Ale Vieniadziktaŭ ličyŭ jaje samaj talenavitaj maładoj žurnalistkaj i vydatnym mieniedžaram. Jaje było šmat usiudy.
Piataha śniežnia rasijskuju miedyja-prastoru ablacieła niečakanaja navina. Rabcava sychodzić z «Echa». Jana špijonka Kramla, Mata Chary ad ŚMI. Dvanaccataha śniežnia Rabcava stała hierainiaj vielmi rejtynhavaj prahramy na rasiejskim dziaržaŭnym telekanale NTV «Novyja ruskija siensacyi». Lejtmatyvam amal hadzinnaj hutarki była «praŭda i apazicyja».
Rabcava vyniesła na publiku «brudnuju bializnu», ź jakoj, pa jaje ŭłasnych słovach, jana sutyknułasia padčas pracy na stancyi. Dziakujučy zastupnictvu Vieniadziktava, jana nabliziłasia da ŭsich apazicyjnych lidaraŭ, pierad joj adkryvalisia dźviery va ŭsie zvyčajna vielmi pilnyja apazicyjnyja łahiery. Ciapier usie ich jana apisvaje ŭ čornych tanach. Zatoje prezidenta Pucina, ad jakoha jana, jak kaža, stajała «na adlehłaści praciahnutaj ruki», Lesia ŭschvalaje jak čałavieka razumnaha i sabranaha.
Snoŭden u spadnicy
Rabcavu prazvali «Snoŭdenam u spadnicy». Pa NTV jana charaktaryzavała viadomyja postaci, takija jak Michaił Chadarkoŭski: «Jon mianie pałochaje». Zhadvaje jana i zmahara z karupcyjaj Alaksieja Navalnaha: «Heta taki ž manipulatar i pravakatar, jak i Chadarkoŭski». Pra eks-premjera urada RF Michaiła Kaśjanava, jaki siońnia źjaŭlajecca lidaram demakratyčnaj apazicyi, jana kaža tak: «Strašny čałaviek, ahidny».
Šef-redaktar «Echa» Alaksiej Vieniadziktaŭ paśla subotniaha intervju Lesi, napeŭna, drenna śpić. Bo mienavita jon uziaŭ jaje ŭ Šviejcaryju na viłu Chadarkoŭskaha, dzie naftavy mahnat nieŭzabavie paśla svajho vyzvaleńnia z turmy ŭ 2013 hodzie sustreŭsia sa svaimi najbližejšymi paplečnikami i siabrami. Tady i ŭ hałavu nikomu nie pryjšło, što Rabcava prysutničaje na viačery dla taho, kab zafiksavać kampramietujučyja padrabiaznaści i zładzić skandał, jaki dyskredytuje apazicyju, čaho nie ŭdavałasia jašče nivodnamu našmat bolš daśviedčanamu žurnalistu.
Ale na samoj spravie vyniki jaje šmathadovaj raźviedvalnaj pracy pa bolšaj častcy ŭjaŭlajuć saboj ničym nie paćvierdžanyja plotki, prydatnyja chiba što dla žoŭtaj presy. Nijakich kankretnych dadzienych ab karupcyi, suviazi z amierykanskimi śpiecsłužbami i ab seksualnaj sapsavanaści apazicyjnych lidaraŭ niama. Usio, što jość, heta tolki zajavy 24-hadovaj maładoj ambicyjnaj žančyny. Lesia abviarhaje toje, što była zasłanaja ŭ samaje serca apazicyjnaha radyjo jak špijonka Kramla. Jana tolki nibyta pierakazvaje svaje ŭražańni. Na samoj radyjostancyi skandał nie kamentujuć. Praŭda, u paniadziełak šef-redaktar Vieniadziktaŭ paviesiŭ na dźviarach kabinieta listok z nadrukavanym prabačeńniem.
* * *
P.S. Kali hety češski artykuł byŭ užo apublikavany, źjavilisia inšyja interpretacyi vypadku z Rabcavaj. My pastarajemsia paznajomić ź imi našu aŭdytoryju.
