Pavodle zadumy navahodniaha prajektu, duety musili składać małady i stały vykanaŭca. Pamidoraŭ i Trubetskoy hetaha praviła nie parušyli, prosta jany ŭziali na siabie adkaznaść jak za papiaredniaje, tak i za novaje pakaleńnie i zrabili rok-versiju hita «Cud na Kalady». Zapisanaja dla prajektu «Śviaty viečar» u 2000-m, jana tryvała ŭvajšła ŭ lik samych paznavalnych biełaruskich zimovych piesień. «Nam heta pieśnia zaŭsiody padabałasia, nikomu jašče nie ŭdavałasia tak arhanična čytać «rahamafin» na movie, jak toje robić Pamidoraŭ u hetym treku! A Pamidoravu ŭ svaju čarhu padabajecca muzyka našaha hurta.Tamu my z radaściu adhuknulisia na ideju zrabić jaje sumiesna», – raspaviadaje vakalist hurta Trubetskoy Pavał Bułatnikaŭ.
«Farmalna Trubetskoy u našym duecie vystupaje ŭ jakaści maładoha hurta, a ja za stałaha vykanaŭcu, choć my zdaŭna razam raśli,vučylisia, bavili čas i vystupali na adnych placoŭkach , – raspaviadaje Alaksandr Pamidoraŭ. – Dla mianie byli sapraŭdnym śviatam hetyja try dni, jakija my praviali razam za pracaju – dva dni repietycyj i adzin dzień zapisu. I ja vielmi ŭdziačny Paŭłu Bułatnikavu, Rusłanu Ŭładyku, Alaksandru Staražuku i Alesiu-Francišku Myškieviču za tuju versiju pieśni, jakaja była stvoranaja. Jana razburyła ŭstalavany ŭžo kanon, zahučaŭšy inakš, i ja vielmi zadavoleny tym, jak jana atrymałasia».
Alaksandr Pamidoraŭ, tuzin.fm
Pieśnia «Cud na Kalady» była zapisanaja ŭžyvuju dla prajektu «Novaje pakaleńnie na Novy hod». Videaversiju hetaha prajektu možna budzie ŭbačyć u noč z 31 śniežnia na 1 studzienia na telekanale «Biełsat». A da hetaha na sajtach Tuzin.fm i Belsat.eu štodnia vas čakaje aŭdyjopremjera piesień. Śpiavajem razam!
