Pieršamu internet-sajtu, jaki byŭ zapuščany 20 śniežnia 1990 hoda, spoŭniłasia 25 hadoŭ, pieradaje partał Engadget.
Tak vyhladaŭ pieršy sajt. Vyjava engadget.com
Resurs pieršapačatkova byŭ zakryty dla šyrokaj publiki, i jaho pieršymi naviedvalnikami stali supracoŭniki CERN. Sajt tłumačyŭ sutnaść raspracavanaha navukoŭcam Cimam Bierniersam-Li hipiertekstavaha prajekta World Wide Web (WWW), jaki dazvalaŭ abmieńvacca infarmacyjaj z kalehami, vykarystoŭvajučy miechanizm hipierspasyłak ŭ dakumientach.
Bierniers-Li pradstaviŭ prajekt WWW na razhlad kiraŭnictva 12 listapada 1990 hoda. Akramia stvareńnia kancepcyi WWW, navukoviec prymaŭ udzieł u vynachodstvie identyfikataraŭ URL, pratakołu HTTP i movy HTML, jakija lahli ŭ asnovu sučasnaj Suśvietnaj pavuciny. Ciapier jaho meta — zrabić internet svabodnym ad cenzury.
CERN (fr. Conseil Européen pour la Recherche Nucléaire — Jeŭrapiejskaja rada pa jadziernych daśledavańniach) — najbujniejšaja ŭ śviecie arhanizacyja, jakaja zajmajecca daśledavańniami ŭ halinie fiziki elemientarnych čaścic. Jana była zasnavanaja ŭ 1954 hodzie 12 krainami-ŭdzielnikami. U ciapierašni čas u CERN pracujuć kala troch tysiač pastajannych supracoŭnikaŭ, uklučajučy fizikaŭ z roznych krain śvietu.
