Ministerstva justycyi ŭ čaćviorty raz admoviła kampanii «Havary praŭdu» ŭ aficyjnaj rehistracyi, paviedamiŭ BiełaPAN aktyvist arhanizacyi Siarhiej Vaźniak, jaki atrymaŭ aficyjny adkaz ź viedamstva.
Pavodle jaho słoŭ, Miniust paličyŭ, što asobnyja dakumienty, padadzienyja arhanizacyjaj, nie adpaviadajuć patrabavańniam, praduhledžanym zakanadaŭstvam. U pryvatnaści na asobnych dakumientach adsutničaŭ podpis kiraŭnika abjadnańnia.
Adzin z kiraŭnikoŭ kampanii Taćciana Karatkievič nazvała BiełaPAN rašeńnie Miniusta «palityčna matyvavanym». Pavodle jaje słoŭ, admova budzie abskardžanaja ŭ Viarchoŭnym sudzie, a ŭ lutym 2016 hoda adbudziecca jašče adna sproba rehistracyi.
Ustanoŭčy schod «Havary praŭdu» adbyŭsia 7 listapada ŭ Minsku. Na im było pryniataje rašeńnie ab uviadzieńni instytuta dvajnoha lidarstva ŭ arhanizacyi. Pasadu staršyni — pradstaŭničuju, źviazanuju z pytańniami hramadska-palityčnaha charaktaru, — zaniała kandydat u prezidenty na vybarach 2015 hoda Taćciana Karatkievič. Staršynioj respublikanskaha savieta abjadnańnia, jaki zajmajecca arhanizacyjna-jurydyčnymi pytańniami, vybrany Andrej Dźmitryjeŭ.
Siarod asnoŭnych zadač abjadnańnia: prapahanda dasiahnieńniaŭ Biełarusi ŭ sacyjalnaj i ekanamičnaj śfierach, analiz hramadskich, sacyjalnych i ekanamičnych prablem krainy i pošuk šlachoŭ ich vyrašeńnia, sadziejničańnie stanaŭleńniu ŭ hramadstvie pryncypaŭ pravavoj dziaržavy, patryjatyzmu, sacyjalnaj spraviadlivaści, zakonnaści i roŭnaści.
Heta ŭžo čaćviortaja sproba kampanii «Havary praŭdu» aficyjna zarehistravać arhanizacyju. Papiarednija, zroblenyja ŭ 2010, 2011 i 2013 hadach, byli niaŭdałymi. Pavodle acenki kiraŭnictva «Havary praŭdu», usie admovy ŭ rehistracyi byli jurydyčna nie abhruntavanymi i palityčna matyvavanymi.
