Vakalist pank-farmacyi Dzieciuki Aleś Dzianisaŭ padrychtavaŭ razam z folk-hurtom «Pałac» pryhožuju kaladnuju kampazicyju na vierš Anatola Brusieviča.
Naradžeńnie pieśni «Kalady» Aleś Dzianisaŭ nazyvaje cudam. «Ja spačatku pahadziŭsia paŭdzielničać u navahodnim prajekcie, a potym razhubiŭsia, bo tema troški nie maja. Vyrašyŭ źviarnucca pa dapamohu da haradzienskich paetaŭ. Nia viedaju čamu, patelefanavaŭ Anatolu Brusieviču i jon mnie prapanavaŭ dva vieršy pra Kalady, jakija i stali pieśniaju. Ja ničoha nie kampavanaŭ: adzin vierš staŭ kupletnaj častkaju, druhi – prypieŭnaj. I niejak naturalna jany adzin da adnaho pakłalisia».
Z napisańniem muzyki, ź jaje formaj i z papiaredniaj aranžyroŭkaj Alesiu dapamoh Dźmitryj «Vins» Ščerba, jaki kaliści hraŭ u hurcie «KalJan». Jon taksama ŭziaŭ udzieł u zapisie pieśni ŭ jakaści soła-hitarysta.
Hurt «Pałac» dapracavaŭ kampazicyju z svajho boku, raskłaŭ jaje na hałasy dy instrumienty. Aleh Chamienka kaža, što jamu adrazu ž spadabaŭsia samy pieršydema-nakid, zrobleny na akustyčnaj hitary – uzrušyŭ hłyboki vieršy dy prostyja i ŭ toj ža čas pravilnyja ŭ jahonym razumieńni harmonii.
«My ničoha nie dadavali, prosta syhrali tvor, jak lahło, na repietycyi. Škada, što jak śled nie atrymałasia zrepietavacca, bo Aleś u Horadni, a my ŭ Miensku, asnoŭnyja momanty prahavaryli pa telefonie i sustrelisia ŭžo tolki na zapisie. Miescami niedakładna zaśpiavaŭ tekst, ale ž vyjšła vielmi pryhoža, ja liču. Vielmi chočam nadalej zrabić studyjnuju fanahramu hetaha tvora», – kaža lidar «Pałacu».
Pieśnia «Kalady» była zapisanaja dla prajektu «Novaje pakaleńnie na Novy hod».Videaviersiju hetaha prajektu možna ŭbačyć u noč z 31 śniežnia 2015 na 1 studzienia 2016 hodu na telekanale «Biełsat».
