29 śniežnia Homielskim abłasnym sudom na vyjaznym pasiadžeńni ŭ Lelčycach vyniesieny pryhavor u dačynieńni da 36-hadovaha žychara rajona. Jon abvinavačvaŭsia na padstavie artykułaŭ za zabojstva, zamach na zabojstva i naŭmysnaje źniščeńnie abo paškodžańnie majomaści.
Jak paviedamili ŭ Homielskim abłasnym sudzie, abvinavačvany pryhavorany da 23 hadoŭ pazbaŭleńnia voli z adbyvańniem pakarańnia va ŭmovach papraŭčaj kałonii ŭzmocnienaha režymu. Taksama sud pastanaviŭ spahnać ź jaho 209 młn. rubloŭ u lik pakryćcia ŭronu, naniesienaha złačynstvam.
U krasaviku 2015 hoda mužčyna padpaliŭ furhon aŭtamabila, u jakim znachodzilisia ludzi. Viartajučysia z pracy ŭ słužbovym aŭtamabili, paśla sumiesnaha raśpivańnia śpirtnych napojaŭ z kalehami, na hlebie asabistych niepryjaznych adnosin jon padpaliŭ vylity na padłohu ŭ centralnaj častcy furhona bienzin. Sam ža vyskačyŭ na chadu z mašyny, dzie znachodzilisia vosiem čałaviek.
Vadziciel rezka źmienšyŭ chutkaść i spyniŭ aŭtamabil, piać čałaviek samastojna pakinuli padpaleny furhon. Troje mužčyn, 29, 36 i 54 hadoŭ, ad naniesienych cialesnych paškodžańniaŭ pamiorli ŭ balnicy. Ahniom źniščany słužbovy aŭtamabil i asabistyja rečy paciarpiełych.
Abvinavačvany nie pryznaŭ svajoj viny. Pavodle jaho słoŭ, jon źbiraŭsia prykuryć, ale nie atrymałasia, a zapałka ŭpała na padłohu, i tamu adbyłosia ŭzharańnie.
Pavodle viersii śledstva, u darozie abvinavačvany zasnuŭ, a kalehi nafarbavali jamu paznohci, vyrašyŭšy tak pažartavać. Kali mužčyna pračnuŭsia i ŭbačyŭ nafarbavanyja paznohci, to razzłavaŭsia i vyrašyŭ adpomścić kryŭdzicielam.
Pryhavor nie nabyŭ moc i moža być abskardžany.