Epicentr cykłona «Danieła» ź Viciebskaj vobłaści sydzie da ranicy 13 studzienia. Pra heta paviedamiła načalnica Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Minpryrody Maryja Hiermiančuk na pasiadžeńni kamisii pa nadzvyčajnych situacyjach pry Saviecie Ministraŭ, pieradaje karespandent BIEŁTA.
«Epicentr cykłona ź Viciebskaj vobłaści sydzie da ranicy, ale reštkavyja źjavy buduć prysutničać jašče na praciahu dnia va ŭsioj krainie», — adznačyła Maryja Hiermiančuk.
Asnoŭnaja chvala śniehapadu, jaki prynios cykłon «Danieła» prajšła ŭ dva etapy: pieršy byŭ u noč na 12 studzienia, druhi — z 06.00 da 09.00. Maksimalnaje vypadzieńnie apadkaŭ było zafiksavana ŭ Minsku i Barysavie.
«Ciapier u stalicy vyšynia śniehavoha pokryva składaje 32 sm na reprezientatyŭnaj placoŭcy. Pierad pačatkam śniehapadu vyšynia śniežnaha pokryva składała 12 sm. Dadałosia 20 sm. Za noč my čakajem dadańnie jašče 2—3 sm», - kanstatavała sinoptyk.
U Viciebsku i Siańnie, paviedamlaje MNS, śniehu navaliła navat 34 sm.
Hiermiančuk adznačyła, što ab 11.00 12 studzienia centr cykłona byŭ nad Baranavičami, dalej prajšoŭ nad Mienskam, ciapier syšoŭ na Viciebsk, dalej pieramieścicca na paŭnočny zachad Rasii.
«U nas buduć reštkavyja źjavy ŭ vyhladzie apadkaŭ, viecier budzie da 10—12 m/s. Ale samaje niepryjemnaje budzie zaklučacca ŭ tym, što reštkavyja ciopłyja masy buduć iści z paŭdniovaha zachadu i paŭdniovaj Jeŭropy, ale ŭžo pačniecca prytok chałodnaha pavietra z poŭnačy. Tamu buduć uźnikać kantrasnyja tempieratury, jakija buduć pravakavać takija niespryjalnyja źjavy — hałalod i hałalodzicu «, — patłumačyła Maryja Hiermiančuk.
Pavodle jaje słoŭ, tempieratura budzie vahacca ad słabych «plusoŭ» u Bresckaj vobłaści da 8 hradusaŭ sa znakam minus pa Viciebskaj vobłaści.
«Jak rastaje śnieh, budzie stvarać skarynku. Na zaŭtrašni dzień vypisanyja papiaredžańni Homielskaj i Mahiloŭskaj vobłaści na hałalod i hałalodzicu. Na asnoŭnaj terytoryi budzie adznačacca, ale nie paŭsiudna», — kanstatavała jana.
Pa słovach Maryi Hiermiančuk, z čaćviarha pačniecca pachaładańnie, pryčym dosyć istotnaje. «My budziem mieć takija ž tempieraturnyja ŭmovy, jak i ŭ pačatku studzienia, — unačy da minus 25. Marazy ŭstanuć, nadvorje budzie dastatkova spakojnaje», — padahulniła jana.
