Ministerstva kultury Biełarusi pakul nie maje namieru samastojna vystupać ź inicyjatyvaj ab prysvajeńni biełaruskaj piśmieńnicy, łaŭreatu Nobieleŭskaj premii pa litaratury 2015 hoda Śviatłanie Aleksijevič niejkich hanarovych zvańniaŭ. Pra heta zajaviŭ na pres-kanfierencyi 13 studzienia ŭ Minsku namieśnik ministra kultury Vasil Černik.
Pavodle zakona «Ab dziaržaŭnych uznaharodach Respubliki Biełaruś» Ministerstva kultury nadzielena pravam inicyjavać prysvajeńnie zvańnia «Hieroj Biełarusi» i inšych hanarovych zvańniaŭ. Takija ž mahčymaści jość u administracyi prezidenta, parłamienta, urada i asobnych ministerstvaŭ, respublikanskich orhanaŭ dziaržkiravańnia, orhanaŭ miascovaha kiravańnia, hramadskich abjadnańniaŭ i kalektyvaŭ rabotnikaŭ.
Pavodle słoŭ Černika, ministerstva hatova razhledzieć prapanovu ab prysvajeńni Śviatłanie Aleksijevič zvańnia, kali takaja pastupić ad hramadskich abjadnańniaŭ «Sajuz piśmieńnikaŭ Biełarusi», jaki ŭznačalvaje Mikałaj Čarhiniec, abo «Sajuz biełaruskich piśmieńnikaŭ» na čale z Barysam Piatrovičam. Čamu Minkultury nie źbirajecca skarystać ułasnaje prava inicyjatyvy, Černik nie patłumačyŭ.
Takim čynam, pazicyja viedamstva pa hetym pytańni zastajecca niaźmiennaj. Nahadajem, 10 śniežnia ministr kultury Barys Śviatłoŭ u hutarcy z žurnalistami taksama zajaŭlaŭ, što Minkultury hatovaje razhledzieć pytańnie ab prysvajeńni Aleksijevič zvańnia «Zasłužany dziejač kultury Respubliki Biełaruś», kali takaja inicyjatyva pastupić ad tvorčych abjadnańniaŭ.
Rašeńnie ab prysudžeńni biełaruskaj piśmieńnicy Śviatłanie Aleksijevič premii pa litaratury było abvieščanaje Nobieleŭskim kamitetam 8 kastryčnika. Premija ŭručanaja za «šmathałosnaje hučańnie prozy i ŭviekaviečańnie pakut i mužnaści». 10 śniežnia karol Šviecyi Karł XVI Hustaŭ uručyŭ biełaruskaj piśmieńnicy miedal i dypłom Nobieleŭskaha łaŭreata na ŭračystaj cyrymonii ŭ Stakholmie. Ni cyrymoniju ŭznaharodžańnia, ni pramovu Nobieleŭskaha łaŭreata biełaruskija telekanały nie tranślavali.
