Śpiecyjalisty Navukova-daśledčaha instytuta fizika-chimičnych prablem Biełdziaržuniviersiteta stvaryli jadomuju plonku na asnovie kruchmału. Raspracoŭka pradstaŭlenaja na vystavie navukovych dasiahnieńniaŭ u ramkach pieršaha Respublikanskaha fiestyvalu moładzievaj navuki, jaki prajšoŭ 19 studzienia ŭ Licei BDU ŭ Minsku.
Sama pa sabie plonka nie maje smaku i pachu, tamu dla nadańnia asablivych arhanaleptyčnych ułaścivaściaŭ u jaje možna dadavać śpiecyi i cukar, charčovyja farbavalniki, adznačyła adna sa stvaralnic jadomaj plonki — małodšy navukovy supracoŭnik NDI fizika-chimičnych prablem BDU Natalla Mielechaviec.
Vykarystoŭvać takuju plonku, pa jaje słovach, u jakaści źniešniaj upakoŭki charčovych praduktaŭ nie miarkujecca. «Jana moža być vykarystanaja jak abałonka dla lipkich ledziancoŭ abo markich prysmakaŭ, pakrytych cukrovaj pudraj, naprykład rachat-łukumu. U jaje taksama možna rasfasavać parcyjonnyja śpiecyi łokšyny chutkaha pryhatavańnia, tady pakiecik navat nie treba adkryvać — prosta zalić kipniem», — adznačyła vučony.
Mielechaviec nie vyklučyła, što raspracoŭka moža spatrebicca i ŭ farmaceŭtycy, naprykład, dla stvareńnia źniešniaj abałonki miedykamientaŭ, jakija vypuskajucca ŭ vyhladzie kapsuł. Adnak usio ž asnoŭnym kirunkam prymianieńnia hetaha praduktu, pa jaje słovach, źjaŭlajecca charčovaja pramysłovaść.
Va ŭmovach instytuta plonka vyrablajecca ŭručnuju. Niahledziačy na peŭnuju techničnuju składanaść jaje vytvorčaści ŭ pramysłovym maštabie, raspracoŭščyki vierać, što jana znojdzie šyrokaje prymianieńnie. Pa słovach navukoŭca, biełaruskija vytvorcy charčovych praduktaŭ užo zacikavilisia navinkaj, ale zamović jaje pakul nichto nie navažyŭsia.
Zrešty, supracoŭnikam instytuta jašče treba budzie udaskanalić raspracoŭku, naprykład, pavialičyć tryvałaść i termin zachoŭvańnia plonki, pakolki z časam jana hublaje svaje ŭłaścivaści.
Sama ideja vyrabu jadomych abo bijaraskładalnych abałonak i jomistaściaŭ dla charčovych praduktaŭ nie novaja. Tak, jašče niekalki stahodździaŭ tamu ŭ Japonii pačali vykarystoŭvać adnarazovy posud z presavanaj rysavaj muki, jaki možna było źjeści. Prykładna ŭ toj ža čas u Jeŭropie navučylisia daŭžej zachoŭvać miasnyja pradukty z dapamohaj žełacinavaj abałonki. U jakaści časovaj upakoŭki i pa hety dzień vykarystoŭvajucca jomistaści z vafielnaha ciesta.
Z-za hłabalnaj ekałahičnaj prablemy, źviazanaj z zabrudžvańniem navakolnaha asiarodździa roznymi palimiernymi adchodami, navukoŭcy prykładajuć usio bolš namahańniaŭ dla stvareńnia jadomych upakovak. Tak, za apošniaje dziesiacihodździe źjavilisia raspracoŭki na asnovie kazieinu, hliceryny i vady, a taksama inšych nietaksičnych rečyvaŭ. Adnak prablema pa-raniejšamu nie vyrašanaja, bo palimiernyja ŭpakoŭki zastajucca tańniejšymi ŭ vytvorčaści.
