Halivud miortvy. Balivud vyčarpaŭsia. Mikitamichałkoŭvud — i toj stamiŭsia. Sustrakaj Vakalivud — kinastudyju z truščob Uhandy, dzie zdymajucca niejmaviernyja bajeviki ź biudžetam 200 dalaraŭ.
Vakaliha — biedny pryharad biednaj stalicy biednaj Uhandy. Śviet nikoli b nie daznaŭsia pra hetuju hłuš, kali b adnojčy ŭ Vakalizie nie zaviałasia kinastudyja Ramon Film Production. Za čas svajho niadoŭhaha isnavańnia miascovyja entuzijasty rukapašnaha boju pad kiraŭnictvam režysiora-scenarysta-pradziusara-apieratara-mantažora Isaaka Nabvany vypuścili bolš za dvaccać zvyšnizkabiudžetnych filmaŭ. Samy viadomy ź ich na siońniašni dzień — bajavik 2011hoda «Chto zabiŭ kapitana Aleksa», trejler da jakoha, što nazyvajecca, uzarvaŭ internet.
Film pra vajnu palicyi i narkahandlaroŭ byŭ całkam zrobleny za miesiac i kaštavaŭ kinastudyi 200 dalaraŭ. Zdymki adbyvalisia na vulicach i ŭ zakutočkach rodnaj Vakalihi, na akciorach było adzieńnie ź ich ułasnaha harderoba, a ŭ scenach hulanki jany trymali ŭ rukach šklanki z padfarbavanaj vadoj, jakaja pavinna była nahadvać darahi ałkahol. Kali režysioru zdavałasia, što ŭ batalnaj scenie zanadta mała ŭdzielnikaŭ, jon apranaŭ na tvar akciora masku i zdymaŭ jaho jašče raz, ale z užo inšaha rakursu.
Jak možna zaŭvažyć, nie tolki vybuchi i razbureńni, ale i kroŭ piersanažaŭ ŭ filmie «Chto zabiŭ kapitana Aleksa» — namalavanaja na kampjutary. Ale tak było nie zaŭsiody. U svaich pieršych rabotach Nabvana vykarystaŭ karovinu kroŭ. Adnak ad jaje daviałosia admovicca, paśla taho jak adzin z akcioraŭ zaraziŭsia praz takuju antysanitaryju brucelozam i nadoŭha trapiŭ u balnicu.
Ad cacačnych aŭtamataŭ i pistaletaŭ, jakimi razmachvali akciory ŭ rańnich vakalivudskich filmach, režysior ciapier taksama admoviŭsia. Bo, niahledziačy na toje, što viertalot ŭ jaho karcinie moža, pralatajučy, razburyć dva haradskija kvartały, Nabvana vystupaje za realizm. «Płastmasavaja zbroja zanadta lohkaja, — kaža jon, — tamu akcioru ciažej pieraŭvasobicca. Voś my i stali rabić butaforskuju zbroju ź mietału. Ź ciažkim aŭtamatam akcior i sam vieryć, byccam trymaje ŭ rukach niešta sapraŭdnaje, i heta dapamahaje jamu hrać lepš».
Kinateatry va Uhandzie nie pakazvajuć filmy Nabvany. Raspaŭsiudžvańniem DVD (pamiataješ, byli takija kruhłyja bliskučyja štuki?) zajmajucca sami akciory, pradajučy dyski na vulicach. Adzin dysk kaštuje 2000—3000 uhandyjskich šylinhaŭ, to bok krychu mieniej za dalar. Kali adniać košt samoha dyska, to navar z kožnaha pradadzienaha DVD u siarednim składaje cełych 15 centaŭ!
I navat heta było b niadrenna, ale pieraškadžajuć miascovyja videapiraty. Zvyčajna kinastudyja prykładna tydzień paśpiachova raspaŭsiudžvaje na vulicach i rynkach Kampały novy vakalivudski film, ale tut padklučajucca handlary nielehalnymi kopijami, i Nabvana sa svaimi akciorami znoŭ akazvajucca ni pry čym. Naprykład, studyi ŭdałosia pradać va Uhandzie 10 tysiač dyskaŭ sa svaim bajevikom «Chto zabiŭ kapitana Aleksa». Piraty ž pradali ŭ dziesiać razoŭ bolš.
Nabvana (druhi źleva) za zdymkaj čarhovaha treš-šedeŭra.
Dva tydni tamu źjaviŭsia trejler najnoŭšaha bajevika Nabvany «Apieracyja «Kakanhalira». Uhandyjskija niastrymnyja», i jon abiacaje dzivosnaje vidovišča.
Paśla abjavy ab zbory srodkaŭ na «Kikstartary» vakalivudskim tvorcam ŭdałosia sabrać pa śviecie nie aby-jakuju sumu. Biudžet «Uhandyjskich niastrymnych» — ažno 2000 dalaraŭ! U dziesiać razoŭ bolš, čym zvyčajna! A značyć — u dziesiać razoŭ bolš vybuchaŭ i krykaŭ «Kija!» z uhandyjskim akcentam.
Nabvana nie źbirajecca spyniacca na dasiahnutym. U najbližejšych płanach režysiora — zdymka błokbastara, jaki apaviadaje ab pryjeździe Abamy va Uhandu. Užo cikava? I heta ty jašče nie viedaješ hałoŭnuju intryhu siužeta. Padčas vizitu amierykanskaha prezidenta skradzie plemia ludažeraŭ!
