Namieśnik staršyni Biełaruskaj sacyjał‑demakratyčnaj partyi (Hramada) Ihar Rynkievič prapanuje abjavić konkurs na nazvu marša dla masavych šeściaŭ demakratyčnych sił i na napisańnie muzyki da jaho.
Jak paviedamiŭ BiełaPAN I.Rynkievič, hod tamu, padčas sustrečy z Alaksandra Kazulina ŭ viciebskaj kałonii, jany abmiarkoŭvali padrychtoŭku da «Čarnobylskaha šlachu — 2007». «Na hetym spatkańni ŭźnikła ideja ab stvareńni teksta marša z adpaviednaj muzykaj dla masavych šeściaŭ demakratyčnych sił. Dapamahčy ŭ hetaj tvorčaj spravie braŭsia Jaŭhien Budzinas, ale chutka piśmieńnik pamior», — skazaŭ I. Rynkievič.
«Zaraz inšy, blizki da sacyjał‑demakrataŭ, jakich uznačalvaje A. Kazulin, aŭtar zakončyŭ napisańnie tekstu marša. Aŭtar — viadomy ŭ krainie paet, ale jon pracuje i nie choča niepryjemnaściej u vypadku taho, kali hety tekst razydziecca ŭ masach. Tamu jon pažadaŭ zachavać kanfidencyjalnaść. Tekst jość, i siońnia, 9 krasavika, ja prezientuju jaho kaleham na pasiadžeńni prezidyuma Palitrady ADS, a na nastupny dzień — arhkamiteta pa praviadzieńni ŭ hetym hodzie «Čarnobylskaha šlachu», — skazaŭ I. Rynkievič.
Kamientujučy abviaščeńnie konkursu, I. Rynkievič padkreśliŭ
«Vierš, što zaraz prapanujecca, nie pretenduje stać novym himnam krainy. Ale jon prykmietna dobra kładziecca na muzyku siońniašniaha aficyjnaha himna, słovy jakoha ni dziaržaŭnyja dziejačy, ni spartoŭcy, ni inšyja biełaruskija hramadzianie tak i nie zachacieli vyvučyć. Rytm marša, kab kročyć demakratyčnym siłam na svaich šeściach, kaniešnie, pavinien stać bolš chutkim».
MARŠ
1.
My, biełarusy, ź imiem‑litvoju
Mieč uzdymali na kryžakoŭ.
Nieśli charuhvy za movu i volu
Ź ciomnych stahodździaŭ da śvietłych viakoŭ.
Prypieŭ:
Pomnim historyi słaŭnyja daty.
Słavim u Śviecie Starym Jeŭraźviaz.
Vierym: suzorje ŭzydzie z‑za krataŭ,
Zorki Jeŭropy zaźziajuć dla nas.
2.
My, biełarusy, i ziemli‑susiedki
U Paspalitaj Rečy žyli.
Našy pałacy, dziaržavy toj śviedki,
Pad pałaniez u niabiosy pajšli.
Prypieŭ.
3.
My, biełarusy, dniom sakavickim
Volnym nazvali rodny naš kraj.
Boža Mahutny, Lićvinski, Kryvicki,
Prodkavu vieru i siłu nam daj!
Prypieŭ.
