Praviły aŭtamabilnych pieravozak hruzaŭ źmienieny ŭ Biełarusi pastanovaj Savieta Ministraŭ numar 102 ad 5 lutaha, paviedamili ŭ pres-słužbie ŭrada.
«U dakumiencie vykładzieny ŭ novaj redakcyi punkty 15, 22 i 340 Pravił aŭtamabilnych pieravozak hruzaŭ u metach vyznačeńnia asobna dla aŭtamabilnaha pieravozčyka i hruzaadpraŭščyka pieraliku dakumientaŭ, jakija jany pavinny pradastavić vadzicielu dla vykanańnia aŭtamabilnych pieravozak hruzaŭ», — rastłumačyli śpiecyjalisty. Taksama dapoŭnieny punkt, što praduhledžvaje vypadki, pry jakich vykanańnie aŭtamabilnaj pieravozki hruzaŭ dapuskajecca biez afarmleńnia tavarna-transpartnaj nakładnoj.
Forma tavarnaj nakładnoj i paradak jaje afarmleńnia vyznačany Instrukcyjaj pa zapaŭnieńni typavych form pieršasnych ulikovych dakumientaŭ TTN-1 «Tavarna-transpartnaja nakładnaja» i TN-2 «Tavarnaja nakładnaja», zaćvierdžanaj Minfinam u 2008 hodzie. Błank tavarnaj nakładnoj formy TN-2 źjaŭlajecca pieršasnym ulikovym dakumientam, u jakim źmieščany vartasnyja pakazčyki pieravozimaha tavaru. «Narmatyŭnaje zamacavańnie afarmleńnia tavarnaj nakładnoj TN-2 zamiest tavarna-transpartnaj nakładnoj TTN-1 u jakaści supravadžalnaha dakumienta na hruz pry eksparcie tavaraŭ nie budzie supiarečyć patrabavańniam raździeła II «Paradak prymianieńnia ŭskosnych padatkaŭ pry eksparcie tavaraŭ» pratakoła ab paradku spahnańnia ŭskosnych padatkaŭ i miechaniźmie kantrolu za ich vypłataj pry eksparcie i imparcie tavaraŭ, vykanańni rabot, akazańni pasłuh, što źjaŭlajecca dadatkam 18 da dahavora ab Jeŭrazijskim ekanamičnym sajuzie», — źviarnuli ŭvahu śpiecyjalisty.
Akramia taho, u praviły dabaŭlena norma, jakaja vyklučaje abaviazak aŭtamabilnaha pieravozčyka praviarać paŭnatu i pravilnaść aformlenych hruzaadpraŭščykam dakumientaŭ na hruz. «Heta dapaŭnieńnie nieabchodna dla vyklučeńnia vypadkaŭ nieabhruntavanaha pryciahnieńnia pieravozčykaŭ da adkaznaści za adsutnaść abo niapravilnaje afarmleńnie hruzasupravadžalnych dakumientaŭ», — udakładnili ŭ pres-słužbie.
U pastanovie kankretyzavany abaviazak hruzaadpraŭščyka pa afarmleńni i pradstaŭleńni pieravozčyku transpartnych i hruzasupravadžalnych dakumientaŭ. Taksama ŭniesieny źmianieńni ŭdakładniajučaha charaktaru ŭ normy ab adkaznaści hruzaadpraŭščyka, źviazanyja z hetym abaviazkam.
Pastanova numar 102 ustupaje ŭ siłu praź miesiac paśla jaje aficyjnaha apublikavańnia, za vyklučeńniem druhoha punkta, jaki ŭstupaje ŭ siłu z dnia pryniaćcia dakumienta.
