Vytvorcy tavaraŭ i pasłuh niaredka dapuskajuć surjoznyja pamyłki ŭ biełaruskamoŭnaj rekłamie, zajaviła na pres-kanfierencyi 19 lutaha ŭ Minsku hałoŭny śpiecyjalist upraŭleńnia ŭstanoŭ kultury i narodnaj tvorčaści Ministerstva kultury Ludmiła Lebiedź.
U pryvatnaści jana źviarnuła ŭvahu na toje, što na pryłaŭkach mahazinaŭ možna ŭbačyć takija pradukty, jak chleb «Ščodryj» i kietčup «Łahodnyj», nazvy jakich napisanyja z pamyłkami ŭ kančatkach.
«Kali vam pa dušy ruskaja mova, tady lepš pišycie biez pamyłak pa-rusku. Ale nie treba stvarać hetyja niejkija žachlivyja moŭnyja navatvory», — skazała Lebiedź
Vykanaŭca abaviazkaŭ dyrektara Instytuta movaznaŭstva imia Jakuba Kołasa Centra daśledavańniaŭ biełaruskaj kultury, movy i litaratury Nacyjanalnaj akademii navuk Ihar Kapyłoŭ adznačyŭ, što instytut hatovy ŭziać na siabie funkcyi centra, jaki b pravodziŭ adpaviednuju linhvistyčnuju ekśpiertyzu biełaruskamoŭnaj rekłamy.
«Usia rekłama, jakaja jość u krainie, prachodziła b praz naš instytut, i takich niedarečnaściaŭ nie było b. Usio było b tolki na karyść raźvićciu i papularyzacyi biełaruskaj movy», — skazaŭ jon.
Pry hetym Kapyłoŭ padkreśliŭ, što «luboje imknieńnie stvarać biełaruskamoŭnuju rekłamu treba vitać» i stavicca da hetaha pracesu «ź ciarpieńniem i razumieńniem».
