Kolkaść hadzin na biełaruskuju movu pavialičycca za košt skaračeńnia fakultatyvaŭ, paviedamiła hałoŭny śpiecyjalist upraŭleńnia ahulnaj siaredniaj adukacyi Ministerstva adukacyi Iryna Bułaŭkina siońnia na pres-kanfierencyi «Papularyzacyja biełaruskaj movy: sučasnaść i pierśpiektyvy».
Jak adznačyła Iryna Bułaŭkina, pavieličeńnie kolkaści hadzin na vyvučeńnie biełaruskaj movy adbudziecca za košt skaračeńnia kolkaści hadzin na fakultatyŭnyja zaniatki. «Tym samym maksimalnaja nahruzka na vučnia nie budzie pavialičana», — skazała jana.
Hałoŭny śpiecyjalist upraŭleńnia rastłumačyła, što z nastupnaha navučalnaha hoda z druhoha kłasa ŭ škołach, niezaležna ad movy navučańnia, na biełaruskuju i ruskuju movy advodzicca adnolkavaja kolkaść hadzin, jak i na biełaruskaje i ruskaje litaraturnaje čytańnie: na vyvučeńnie moŭ - try hadziny, litaratury — dźvie hadziny ŭ tydzień. Praz hod novaŭviadzieńnie źjavicca ŭ druhim-trecim kłasach, praz dva hady - u druhim, trecim i čaćviortym kłasach.
«Takim čynam u pačatkovaj škole na praciahu troch hadoŭ adbudziecca pastupovy pierachod da vyvučeńnia dźviuch dziaržaŭnych moŭ u roŭnaj kolkaści hadzin», — dadała Iryna Bułaŭkina.
Uviadzieńnie adnolkavaj kolkaści hadzin vyklikana nieabchodnaściu stvareńnia roŭnych umoŭ vučniam, jakija navučajucca ŭ biełaruskamoŭnych i ruskamoŭnych škołach, dla vyvučeńnia hetych pradmietaŭ i zachavańnia pryncypu pierajemnaści na pieršaj i druhoj stupieni ahulnaj siaredniaj adukacyi.
U pieršym kłasie kolkaść hadzin zastaniecca raniejšaj, tamu što vučni tolki pačynajuć vyvučać hramatu, farmirujucca bazavyja viedy, umieńni i navyki čytańnia i piśma.
Zahadčyca kafiedry maładziožnaj palityki i sacyjakulturnaj kamunikacyi Respublikanskaha instytuta vyšejšaj škoły kandydat kulturałohii Ludmiła Kažuchoŭskaja ŭ svaju čarhu raskazała, jakija novaŭviadzieńni zapłanavany dla adukacyi nastaŭnikaŭ.
«U hetym hodzie my naładzili cudoŭnuju prahramu pavyšeńnia kvalifikacyi «Biełaruskaja mova jak srodak piedahahičnaj, navukovaj i tvorčaj dziejnaści». Nazirajem praźmiernuju cikavaść vykładčykaŭ da hetaj prahramy», — zaŭvažyła jana.
Pavodle słoŭ Ludmiły Kažuchoŭskaj, z hetaha hoda ŭ prahramu dziaržaŭnych navukovych daśledavańniaŭ uklučany zadańni pa stvareńni centra siertyfikacyi biełaruskaj movy jak zamiežnaj, aryjentavanaha na zamiežnych hramadzian. Buduć raspracavany dziaržaŭnyja standarty pa biełaruskaj movie jak zamiežnaj, typavyja, siertyfikacyjnyja testy.
«Spadziajusia, što vielmi chutka ŭ nas u Biełarusi budzie dziaržaŭny centr siertyfikacyi biełaruskaj movy jak zamiežnaj», — reziumavała jana.
