Premjer RF Dźmitryj Miadźviedzieŭ prapanuje pieranieści vytvorčaść šasi dla rasijskaj vajennaj techniki ź Minskaha zavoda kołavych ciahačoŭ na KAMAZ.
Pryčynaj jon nazvaŭ toje, što Biełaruś nie zachacieła pradavać hety zavod rasijskamu boku.
Zajava prahučała padčas vizitu Miadźviedzieva na Motavilichinskija zavody ŭ Piermi, pieradaje interfax.by.
Tam rasijskamu premjeru pakazali šerah uzoraŭ rasijskaj vajennaj techniki, jakuju vypuskajuć na pradpryjemstvie. Kala transpartna-zaradnaj mašyny 9T255 RSZA «Tarnada-Z» čynoŭnik pacikaviŭsia, na jakim šasi jana vyrablajecca. Pačuŭšy, što šasi pastaŭlaje minski zavod, Miadźviedzieŭ zajaviŭ: «Z hetym MZKC viasiołaja historyja. Jany try hady pradavali hety MZKC, ale tak my ni pra što nie damovilisia».
Tamu jon prapanavaŭ pieranieści vytvorčaść na KAMAZ: «Kali nie chočuć pradavać — nie treba, my na KAMAZie naładzim vytvorčaść».
U žniŭni 2015 hoda Alaksandr Łukašenka zajaviŭ, što dziaržava pakul nie maje namieru pradavać Minski zavod kołavych ciahačoŭ, ale kali prapanujuć 3 miljardy dalaraŭ, to jon padumaje. Pavodle jaho słoŭ, apošnija hod-dva jamu naviazvajuć ideju pryvatyzacyi i prodažu hetaha pradpryjemstva. Sam ža Łukašenka admoŭna stavicca da idei pryvatyzacyi: «Majo staŭleńnie da pryvatyzacyi vy viedajecie. Nie my heta z vami stvarali, heta stvorana niekalkimi pakaleńniami, pa mienšaj miery, my treciaje pakaleńnie, jakoje tut pracuje, i nie nam z vami vyrašać u korani hetuju prablemu. Choć, kali paŭstanie pytańnie, — daviadziecca».