Papulacyja klaščoŭ u Biełarusi za pieršyja miesiacy 2016 hoda ŭ paraŭnańni z anałahičnym pieryjadam minułaha hoda pavialičyłasia ŭ dva razy, paviedamiŭ zahadčyk adździeła epidemijałohii Respublikanskaha centra hihijeny, epidemijałohii i hramadskaha zdaroŭja Uładzimir Paškovič 18 maja na pres-kanfierencyi ŭ Minsku.
Rostu papulacyi, na jaho dumku, spryjaje hłabalnaje paciapleńnie. «U Biełarusi ŭstalavalisia miakkaja zima i rańniaja viasna, siaredniaja tempieratura letaś pieravyšała normu na 2,7 hradusa, tamu klaščy dobra zachoŭvajucca padčas zimovaj śpiački, mienš hinuć, a nadvorje spryjaje ich raźvićciu i razmnažeńniu», — skazaŭ Paškovič.
Pavodle słoŭ śpiecyjalista, za dva miesiacy hetaha hoda z pryčyny ŭkusaŭ klaščoŭ da miedykaŭ źviarnulisia pryblizna 2,3 tys. čałaviek, prykładna 700 ź ich — dzieci. Najbolšaja kolkaść zvarotaŭ zafiksavanyja ŭ Bresckaj, Hrodzienskaj abłaściach i Minsku.
Letaś, jak pakazali entamałahičnyja daśledavańni, kolkaść klaščoŭ u biełaruskaj pryrodzie vyrasła na 28%. Niahledziačy na heta, lik zvarotaŭ u suviazi z ukusami byŭ na 15% mienšym, čym u 2014 hodzie. Na dumku hihijenista, hetamu spryjajuć miery prafiłaktyki pa baraćbie z klaščami.
Paškovič paviedamiŭ, što klešč žyvie ŭ travie i pad liściem, pry hetym vyšej za mietr pa raślinach nie padymajecca. Pik aktyŭnaści klaščoŭ — viasna, kali tempieratura pavyšajecca da plus 5°S, i vosień.
Adkazvajučy na pytańni žurnalistaŭ, Paškovič vykazaŭ sumnieŭ u efiektyŭnaści zdačy na analiz źniataha ź cieła klašča. «Zdavać klašča na analiz i čakać vyniku — heta strata času, — ličyć jon. — Bolš plonna adrazu paśla ŭkusu adnakratna pryniać dźvie kapsuły antybijotyka, naprykład daksicyklinu, što zabiaśpiečvaje poŭnuju prafiłaktyku zachvorvańnia na Łajm-barelijoz».
Jon padkreśliŭ, što havorka idzie tolki pra darosłych, dziaciej da doktara treba vieści ŭ lubym vypadku.
Što da encefalitu, to nieabchodna na praciahu miesiaca paśla ŭkusu nazirać za stanam zdaroŭja. «Kali ŭ vas pavysiłasia tempieratura, vas pačało treści, adrazu idzicie da doktara i kažycie, što vas pakusaŭ klešč», — rekamienduje Paškovič.
