Papa Francišak padčas ahulnaj aŭdyjencyi 18 maja na płoščy śviatoha Piatra ŭ Vatykanie dabrasłaviŭ abraz śviatoha Jana Paŭła II, jaki pryznačany dla minskaj katalickaj parafii, nazvanaj jaho imiem, paviedamlaje biełaruskaja redakcyja Vatykanskaha radyjo.
Abraz byŭ dobrasłaviony ŭ dzień naradžeńnia śviatoha Jana Paŭła II, jakomu siońnia spoŭniłasia b 96 hadoŭ. Abraz napisała italjanskaja mastačka Anna Tedalderyčonie. Jon ujaŭlaje saboj dakładnuju kopiju kananizacyjnaha abraza byłoha pantyfika.
Miarkujecca, što abraz zojmie miesca ŭ centralnym ałtary pakul jašče nie pabudavanaha kaścioła parafii, jakaja nosić imia Jana Paŭła II. Raspracavać prajekt budučaha kaścioła pahadziŭsia italjanski architektar Džuzepie Senpryni. Ciapier prychadžanie staličnaj parafii Jana Paŭła II damahajucca dazvołu na budaŭnictva kultavaha zbudavańnia ŭ staličnym mikrarajonie Brylevičy (Družba).
«Była pieršaja sproba atrymać učastak, ale, na žal, nam admovili, pakolki ciapier u Minsku budujecca šmat kaściołaŭ, — pryvodzić Vatykanskaje radyjo słovy probašča parafii ksiandza Ihara Łašuka. — Spadziajusia, krok pa kroku my budziem prasoŭvacca, pradstavim potym usie nieabchodnyja dakumienty. budziem staracca chutčej arhanizavać parafijalnaje žyćcio».
«Ja spadziajusia, što śviaty Jan Pavieł II zastupicca za nas pierad Ajcom niabiesnym, pakolki Minsku sapraŭdy patrebnyja novyja kaścioły. My razumiejem, što zastajucca pustavać kaścioły ŭ vioskach, dzie mała ludziej, nam škada hetyja kaścioły, ale adbyvajecca mihracyja ŭ harady. U Minsku žyvie piataja častka nasielnictva krainy, i tut nie tolki dziesiać kaściołaŭ pavinna być», — ličyć ksiondz.
