«Jak pradstaŭnik biełaruskich demakratyčnych siłaŭ, ja zaklikaju da nieadkładnaha i biezahavorkavaha vyzvaleńnia Oskara Bisieta Hansalesa i inšych palitviaźniaŭ Kuby, jakija byli źniavolenyja za realizacyju padstavovych hramadzianskich pravoŭ, harantavanych Usieahulnaj dekłaracyjaj pravoŭ čałavieka», — piša ŭ svaim liście Alaksandar Milinkievič.
Lider Ruchu «Za Svabodu» adznačaje, što biełaruskija demakratyčnyja siły, jakija vystupajuć za nieadkładnaje vyzvaleńnie troch biełaruskich palityčnych viaźniaŭ Alaksandra Kazulina, Andreja Kima, Siarhieja Parsiukieviča vyražajuć svaju salidarnaść z usimi, chto zmahajecca za pravy čałavieka i demakratyčnyja svabody va usim śviecie.
«My pierakananyja, što i kubincy, i biełarusy zasłuhoŭvajuć demakratyčny urad, jaki pavažaje pravy i svabody hramadzian. Vyzvaleńnie palityčnych viaźniaŭ u našych krainach źjaŭlajecca pieršym krokam na šlachu viartańnia ŭ mižnarodnuju supolnaść demakratyčnych nacyjaŭ», — adznačaje Alaksandar Milinkievič.
DAVIEDKA:
Doktar Oskar Bisiet Hansales (Oscar Elías Biscet González) źjaŭlajecca zasnavalnikam i staršynioju kubinskaha Fondu pravoŭ čałavieka. Jon adbyvaje 25‑hadovy termin źniavoleńnia z 2002 hoda, kali jaho ŭ čarhovy raz aryštavali. Jaho asudzili razam ź inšymi dysydentami i žurnalistami za toje, što jon nibyta akazaŭsia «najmitam zamiežnaj dziaržavy». Raniej Oskar Bisiet Hansales adbyvaŭ 3 hady źniavoleńnia za vyviešvańnie kubinskaha ściaha dahary nahami ŭ znak pratestu suprać palityčnych niesvabod na Kubie.
Žurnalist, zasnavalnik niezaležnaj medyčnaj asacyjacyi dokatar Chase Łuisa Harsija Panek (Dr. José Luis García Paneque) asudžany da 24 hadoŭ źniavoleńnia.
Pravaabaroncy paviedamlajuć, što palitźniavolenyja na Kubie znachodziacca ŭ niečałaviečych umovach, šmat chto ź ich pakutuje na chraničnyja zachvorvańni.
