Mižnarodny muzyčny šoŭkiejs-fiestyval MENT Ljubljana, jaki adbudziecca ŭ stalicy Słavienii 1—3 lutaha 2017 hoda, zaprašaje biełaruskich muzykaŭ sučasnych napramkaŭ. Zajaŭki prymajucca da 5 vieraśnia pra padtrymcy Experty.by.
MENT Ljubljana źjaŭlajecca najbujniejšym šoŭkiejs-fiestyvalem u rehijonie, z prysutnaściu arhanizataraŭ fiestyvalaŭ, pradstaŭnikoŭ łejbłaŭ, bukieraŭ i žurnalistaŭ z Zachodniaj, Centralnaj i Uschodniaj Jeŭropy. U lutym 2016 jaho naviedali bolš za 3 tysiačy hledačoŭ i 320 śpiecyjalistaŭ z 27 krain śvietu. Na fiestyvali vystupili bolš za 50 artystaŭ z 20 krain.
Hod tamu biełaruskija artysty dasłali 60 zajavak na MENT Ljubljana, ź jakich arhanizatary abrali Super Besse i Mustelide. Jany zasłužyli bahata kamplimientaŭ ad słavienskich ŚMI i zamiežnych śpiecyjalistaŭ, a taksama atrymali šerah karysnych kantaktaŭ. To bok biełarusaŭ tam užo viedajuć i čakajuć. Ale paŭtaracca šoŭkiejs-fiestyvali nie lubiać, tamu ŭ hetym hodzie ŭ Lublanu ad Biełarusi pajedzie niechta inšy.
– Biełaruskaja delehacyja stała vielmi važnaj i jaskravaj častkaj minułaha fiestyvalu MENT Ljubljana, – kaža adzin z kiraŭnikoŭ fiestyvalu Maćjaž Manček. – Enerhičny post-pank Super Besse i stylny elektra-pop Mustelide zrabili najmacniejšaje ŭražańnie na našu publiku i haściej fiestyvalu. Akramia taho, my daviedalisia šmat cikavaha pra biełaruskuju muzyčnuju scenu padčas lekcyi ŭ miežach prafiesijnaj kanfierencyi. Tamu my vielmi čakajem na novyja imiony ź Biełarusi!
– Być udzielnikam MENT 2016, biezumoŭna, spadabałasia, – raspaviadaje vakalist Super Besse Maksim Kulša. – Lublana – miły horad ź vidam na Alpy i adkrytymi žycharami. Sam šoŭkiejs zrobleny na dastatkova vysokim uzroŭni, a praktyčnaja karyść ad udziełu adčuvałasia ŭžo na samim mierapryjemstvie. Nas tam hladzieli nie tolki pradstaŭniki byłoj Juhasłavii, ale i surjoznyja anhličanie, francuzy, niemcy. Pa vynikach MENT Ljubljana my atrymali šerah važnych zaprašeńniaŭ pa kancertach i fiestyvalach u roznych kutkach Jeŭropy.
Artysty, jakich abiaruć arhanizatary, atrymajuć kampiensacyju transpartnych vydatkaŭ na sumu 250 jeŭra (na hurt), žytło, biaspłatny propusk na adnaho čałavieka na kanfierencyju i dostup da bazy kantaktaŭ delehataŭ fiestyvalu. Zajaŭki prymajucca da 5 vieraśnia praz bukinhavy servis Gigmit. Aficyjny sajt fiestyvalu www.ment.si.
Akramia hetaha da 1 žniŭnia biełaruskija muzyki mohuć padać zajaŭku na litoŭski šoŭkiejs-fiestyval What's Next In Music? (pierajemnik Vilnius Music Week, u miežach Loftas Fest), jaki adbudziecca 2 i 3 vieraśnia ŭ Vilni. Pieramožcy adboru vystupiać pierad mižnarodnymi śpiecyjalistami na adnoj placoŭcy z Daughter (Vialikabrytanija), Gesaffelstein (Francyja) i inšymi viadomymi artystami. Zajaŭki prymajucca praz staronku Eventbuizz.
