U sudzie Minskaha rajona razhladajecca kryminalnaja sprava ŭ dačynieńni da 11 žycharoŭ Puchavickaha rajona. Mužčyny abvinavačvajucca ŭ tym, što ŭ 2013—2014 hadach vykradali i hvałtavali prastytutak, jakija pracavali na trasie.
Jak paviedamili Naviny.by u sudzie, razhlad spravy pačaŭsia 5 lipienia. Ni adzin z abvinavačanych svajoj viny nie pryznaje. Praces prachodzić u zakrytym režymie.
Złačynstvy ździajśnialisia pa adnoj schiemie. Hrupa mužčyn padjazdžała na aŭtamabili da prypynkaŭ hramadskaha transpartu na šašy Minsk—Mahiloŭ, dzie źbiralisia prastytutki. Pasažyry zahadzia vychodzili z aŭtamabila, a kiroŭca pad vyhladam klijenta padjazdžaŭ da dziaŭčat i damaŭlaŭsia z kim-niebudź ź ich ab akazańni seksualnych pasłuh. Atrymaŭšy zhodu dziaŭčyny, zaprašaŭ jaje ŭ mašynu i błakavaŭ dźviery. Užo na darozie, va ŭmoŭlenym miescy, da jaho padsadžvalisia astatnija.
U niekatorych vypadkach dziaŭčynu hvałtoŭna zapichvali ŭ mašynu. Achviary vyvozilisia ŭ roznyja nasielenyja punkty Puchavickaha rajona i inšyja miescy. Ich hvałtavali, ździajśniali inšyja dziejańni seksualnaha charaktaru. Byli vypadki, kali ŭ dziaŭčat adkryta adbirali hrošy i asabistyja rečy.
Usiaho pa spravie prachodzić 14 paciarpiełych.
Abvinavačanych sudziać pa roznych artykułach abo častkach artykułaŭ Kryminalnaha kodeksa: kahości pa art. 166 (zhvałtavańnie), kahości — pa art. 167 (hvałtoŭnyja dziejańni seksualnaha charaktaru) i inšych artykułach.
Niekatoryja z abvinavačanych raniej sudzimyja. Mnohija žanatyja, u ich jość dzieci.
Rod dziejnaści abvinavačanych nie paviedamlajecca, ale viadoma, što jany pracujuć u Minsku, a žyvuć u Puchavickim rajonie.
U vypadku paćviardžeńnia viny ŭ sudzie im moža być pryznačana pakarańnie ŭ vyhladzie pazbaŭleńnia voli na termin da 15 hadoŭ.
