Malunak nosić ilustracyjny charaktar.
Havorka idzie pra vajskovuju čaść 97020 u Viciebsku — siły śpiecyjalnych apieracyj Ministerstva abarony. Heta, z adnaho boku, elitnaja čaść. Słužać tut najlepšyja z najlepšych. Ź inšaha boku, zasakrečanaja čaść. Viadoma, što jaje bajcy brali ŭdzieł u antyterarystyčnych vučeńniach naroŭni sa śpiecnazam MUS, KDB i pahranvojskaŭ.
U Ministerstvie abarony admaŭlajucca kamientavać abstaviny trahiedyi.
«Straty vajskoŭcaŭ i cyvilnaha piersanału nie było, — rastłumačyŭ pres-sakratar viedamstva Uładzimir Makaraŭ. — Nijakich inšych kamientaroŭ ministerstva davać nie budzie».
Zahinułaja Volha (jaje proźvišča i proźvišča muža my nie nazyvajem pa etyčnych mierkavańniach), sapraŭdy, nie pracavała ŭ vajskovaj čaści. Ale tam słužyŭ jaje muž. Pavodle infarmacyi na 2013 hod, u zvańni majora. Tady pra jaho pisała vajskovaja hazieta «Vo słavu Rodiny». Ale za apošnija try hady, mahčyma, zvańnie pavysili.
Mienavita jon u dzień naradžeńnia žonki arhanizavaŭ dla jaje skačok, vykarystaŭšy parašut, jaki znachodziŭsia na bałansie vajskovaj čaści. Samalot pradastaviŭ miascovy DTSAAF, ale damova arendy była zaklučana nie ź fizičnaj asobaj, a z vajskovaj čaściu.
«Da adkaznaści našy supracoŭniki nie pryciahvalisia. Samalot lotaje, i my pracujem, — rastłumačyli karespandentu Naviny.by u Viciebskim aerakłubie. — Kali my arhanizoŭvajem skački, našy instruktary ŭkładvajuć parašuty. Jany niasuć za heta adkaznaść. Usie parašuty pravierany, prachodziać techničnyja ahlady. Prybory, jakija vypuskajuć zapasny parašut u vypadku, dapuścim, straty prytomnaści, taksama praviarajuć. Na praciahu troch-čatyroch hadzin da skačku pravodzicca instruktaž. Ale kali skačuć siły śpiecapieracyj, u ich svaje pravierki, kantrol, abstalavańnie i dopuski — usio svajo. U ich jość svaje śpiecyjalisty, svaje parašuty. My dajom tolki samalot u arendu».
Takija trahiedyi zdarajucca vielmi redka. «Stapracentnaja biaśpieka pry vykanańni ŭsich patrabavańniaŭ», — zapeŭnivajuć u Viciebskim aerakłubie DTSAAF.
U 2010 hodzie na aeradromie, raźmieščanym u Viciebskim rajonie, padčas skačku z parašutam raźbiŭsia 26-hadovy praparščyk. Tady ŭ vajennaj prakuratury zajaŭlali, što kupał parašuta całkam nie raskryŭsia, vajskoviec pry padzieńni atrymaŭ traŭmy i pamior na miescy.
Važna razumieć, što, pa-pieršaje, isnujuć miedycynskija supraćpakazańni dla ździajśnieńnia skačka z parašutam. I čałavieka pierad skačkom pavinien pravieryć doktar. Pa-druhoje, treba viedać, jak pracuje parašut, heta značyć prajści admysłovy instruktaž. Pa-treciaje, achvotny ździejśnić skačok padpisvaje dakumient ab tym, što ŭsia adkaznaść lažyć na im. Ci byli vykananyja ŭsie hetyja pracedury pierad śmiarotnym skačkom, nam nieviadoma. Ale vajskovyja čaści, u adroźnieńnie ad DTSAAF, naohuł nie zajmajucca arhanizacyjaj skačkoŭ dla nievajskoŭcaŭ.
Ab tym, što zdaryłasia ŭ Viciebsku kažuć roznaje. Siamju charaktaryzujuć tolki sa stanoŭčaha boku. Viadoma, što muž i žonka vychoŭvali 12-hadovaje dzicia.
Pa adnoj ź viersij, parašut byŭ nieprydatny dla vykarystańnia. Pa inšaj, zahinułaja spałochałasia i niapravilna dziejničała ŭ situacyi, jakaja skłałasia. Viadoma, što skakała jana adna, a nie ŭ tandemie. I dośviedu skačkoŭ z parašutam u jaje praktyčna nie było.
Da praŭdy pavinna dajści śledstva. Pa najaŭnaj infarmacyi, aficeru pradjaŭlenaje abvinavačvańnie pa častcy 3 artykuła 455 KK (złoŭžyvańnie ŭładaj, pieravyšeńnie ŭłady albo biaździejnaść ułady). Kali jaho vina budzie dakazanaja, jamu pahražaje ad 5 da 12 hadoŭ pazbaŭleńnia voli.
Aficyjny pradstaŭnik Śledčaha kamiteta Julija Hančarova zajaviła, što nie vałodaje infarmacyjaj z nahody dadzienaj trahiedyi. Pres-sakratar KDB Dźmitryj Pabiaržyn taksama nie zmoh prakamientavać toje, što zdaryłasia, spasyłajučysia na toje, što znachodzicca ŭ adpačynku.
