Bližejšym časam čakajucca novyja pryznačeńni ŭnutry biełaruskaha dypłamatyčnaha korpusu. Pa źviestkach «Našaj Nivy», namieśnica ministra zamiežnych spravaŭ Alena Kupčyna adpravicca pasłom u Vienu.
Hetuju infarmacyju paćvierdziŭ mižnarodny ahladalnik Raman Jakaŭleŭski.
Alena Kupčyna sprabavała narmalizavać biełaruska-jeŭrapiejskija adnosiny.
«Heta nie sakret, Kupčyna ŭžo raźvitvajecca pacichu z usimi ŭ Biełarusi. Nakolki viadoma, jana ŭžo navat atrymała ahreman [zhodu krainy na pryznačeńnia dypłamata — «NN»]. Ciapier jana nie jedzie, bo tam nieviadoma kamu ŭručać davierčyja listy, čakajucca pieravybary prezidenta», — kaža spadar Jakaŭleŭski.
Pasolstva Biełarusi ŭ Vienie ad 2011 hoda ŭznačalvaje Valeryj Varaniecki. Piać hadoŭ — heta niemały dla dypłamata termin.
Jakaŭleŭski ličyć, što Varanieckaha nie pryznačać u MZS na miesca Kupčynoj.
«Valeryj Varaniecki — heta čałaviek Łatypava, a kadry Łatypava siońnia nie samyja papularnyja ŭ našym MZS».
Alena Kupčyna naradziłasia ŭ 1965 hodzie ŭ Minsku. Skončyła jurydyčny fakultet BDU (1987), kandydat jurydyčnych navuk. Ad 1992 hoda – u Ministerstvie zamiežnych spravaŭ. Ad 2006 da 2012 Kupčyna była pasłom Biełarusi ŭ Vienhryi.
«Jana vielmi ŭdała adpracavała ŭ Budapiešcie. Da jaje stavilisia tam ź vialikaj pavahaj. Vyvučyła vienhierskuju movu, syn chadziŭ u vienhierskuju, a nie anhlijskuju škołu. Jana vielmi aŭtarytetny dypłamat. Jaje styl — emacyjnaja dypłamatyja.
I treba pryznać, što taki styl vielmi ŭdały i efiektyŭny. Apošnim časam jana adkazvała za kantakty ź Jeŭropaj — i vielmi ŭdała. Jana zabiaśpiečyła pazityŭnyja vyniki na hetaj hlebie. Kupčynu z zadavalnieńniem paŭsiul prymali», — kaža Raman Jakaŭleŭski.
Ź inšych navin — čakajecca, što pasłom u Hiermaniju budzie pryznačany kiraŭnik upraŭleńnia ahulnajeŭrapiejskaha supracoŭnictva Ministerstva zamiežnych spraŭ 40-hadovy Dzianis Sidarenka. Za jahonuju erudycyju Sidarenku časam nazyvajuć «vunderkindam z MZS».
Pasada pasła Biełarusi ŭ Hiermanii vakantnaja ad listapada 2015 hoda, kali paśla ciažkaj chvaroby pamior papiarednik pasoł Andrej Hiro.
