Najbližejšym časam Litva nakiruje Biełarusi notu z prośbaj padać infarmacyju ab vynikach rasśledavańnia incydentu na budplacoŭcy Biełaruskaj AES, paviedamili ŭ pres-słužbie MZS Litvy.
U źniešniepalityčnym viedamstvie ŭdakładnili, što jak tolki ź`iaviłasia infarmacyja pra incydent 10 lipienia ŭ biełaruskich ŚMI, litoŭskaje MZS nieadkładna paprasiła rastłumačeńniaŭ u pasolstva Biełarusi ŭ Vilniusie. U adkaz biełaruskaja dypmisija pieradała zajavu Ministerstva enierhietyki Biełarusi ab tym, što «niaštatnaja situacyja adbyłasia na placoŭcy zachoŭvańnia korpusa reaktara pry praviadzieńni takiełažnych rabot pa jaho pieramiaščeńni ŭ haryzantalnaj płoskaści».
U MZS Litvy padkreślili, što ŭ intaresach ahulnaj biaśpieki, a taksama ŭ intaresach samoj Biełarusi jana pavinna nieadkładna prainfarmavać MAHATE i susiednija krainy ab usich detalach zdareńnia.
Nahadajem, 25 lipienia ŭ ŚMI ź`iavilisia paviedamleńni, što 10 lipienia padčas vyprabavalnaj trenirovačnaj ŭstanoŭki korpusa reaktara 330-tonny ahrehat sarvaŭsia i ŭpaŭ z vyšyni ad 2 da 4 mietraŭ. Paviedamlałasia taksama, što miesca nadzvyčajnaha zdareńnia ačeplenaje i znachodzicca pad pastajannaj i ŭzmocnienaj achovaj.
«Na spravie, pavodle infarmacyi hienieralnaha padradčyka AT «Atamstrojekspart», niaštatnaja situacyja adbyłasia na placoŭcy zachoŭvańnia korpusa reaktara pry praviadzieńni takiełažnych rabot pa jaho pieramiaščeńni ŭ haryzantalnaj płoskaści», — paviedamiła ŭ suviazi z hetym Minenierha.
Respublikanskaje ŭnitarnaje pradpryjemstva «Biełaruskaja AES», jakoje ź`iaŭlajecca zamoŭcam prajekta, «nieadkładna zapatrabavała ŭ hienieralnaha padradčyka ŭsie nieabchodnyja dakumienty i źviestki. Analiz hetaj situacyi praciahvajecca», adznačałasia ŭ kamientaryi. «Paśla ŭsiebakovaha vyvučeńnia biełaruskimi śpiecyjalistami padadzienaj AT «Atamstrojekspart» infarmacyi budzie prymacca adpaviednaje rašeńnie. Pry hetym biełaruski bok budzie najpierš kiravacca nieabchodnaściu biezumoŭnaj arhanizacyi biaśpieki stancyi, jakaja budujecca», — zapeŭnili ŭ Minenierha.
Heta ŭžo nie pieršaje paviedamleńnie ab NZ na budaŭničaj placoŭcy stancyi. MZS Litvy dvojčy (u mai i červieni) uručała pasłu Biełarusi notu ŭ suviazi z mahčymymi incydentami na placoŭcy AES, jakaja budujecca za 50 kiłamietraŭ ad Vilniusa.
Incydenty, jakija paŭtarajucca na Biełaruskaj AES, pakazvajuć, što aściarohi Litvy adnosna biaśpieki hetaj stancyi abhruntavanyja, zajaviła 26 lipienia litoŭski prezident Dala Hrybaŭskajte. «Biełaruś unikaje ad adkazaŭ na pytańni pra biaśpieku, nie žadaje puścić naziralnikaŭ, i heta vyklikaje ŭ nas niepakoj ŭvieś čas, — skazała jana. — Avaryjnyja vypadki, što paŭtarajucca adzin za adnym, pakazvajuć, što našy aściarohi byli abhruntavanyja, tamu Litva i ŭ dalejšym budzie imknucca razam ź mižnarodnaj supolnaściu paŭpłyvać, kab patrabavańni da biaśpieki byli harantavana zachavanyja».
Pavodle słoŭ litoŭskaha prezidenta, kali Biełaruś nie prymie miery da zachavańnia standartaŭ biaśpieki, Litva razam ź mižnarodnaj supolnaściu pastarajecca pieraškodzić dziejnaści stancyi.
