Sa žniŭnia 2016 hoda mabilnyja bryhady Sił śpiecyjalnych apieracyj Respubliki Biełaruś znoŭ buduć nazyvacca jak u savieckija časy — 103-ja pavietrana-desantnaja i 38-ja desantna-šturmavaja.
Pra heta paviedamiła siońnia aficyjnaja hazieta Minabarony.
«U metach zachavańnia pierajemnaści pakaleńniaŭ, pavyšeńnia matyvacyi vajennasłužačych i honaru za prynaležnaść da padraździaleńniaŭ, jakija majuć słaŭnyja bajavyja tradycyi, a taksama ŭmacavańnia maralnaha duchu», — havorycca ŭ publikacyi.
Ciapier u Biełarusi kolkaść vajenna-transpartnaj avijacyi — u lepšym vypadku 20 samalotaŭ. Hetyja samaloty nie mohuć padniać u pavietra i desantavać navat adnu bryhadu.
U sučasnych umovach uvohule niezrazumieła, dla čaho Biełarusi mieć pavietrana-desantnyja čaści, uličvajučy toje, što ŭ vypadku vajny ź lubym susiedam transpartnyja samaloty, jak heta ŭžo było va Ukrainie, chutčej za ŭsio, niemahčyma budzie vykarystoŭvać blizka da linii frontu, a zalot na varožuju terytoryju budzie samazabojstvam.
Navat Maskva ź Pieršaj vajny ŭ Čačni i dahetul (to bok bolš za 20 apošnich hod) vykarystoŭvaje svaje «pavietrana-desantnyja» bryhady i dyvizii vyklučna jak lepš padrychtavanuju zvyčajnuju piachotu.
Mahčyma, dla padvyšeńnia honaru i matyvacyi žaŭnieraŭ usioj biełaruskaj armii było b karyśniej, kab jany ŭvieś čas addavali bajavoj padrychtoŭcy.
Adnak na heta čamuści mahčymaściaŭ u našaj dziaržavy nie chapaje — na minułym tydni čarhovy raz Uzbrojenyja Siły Respubliki Biełaruś byli paklikanyja na dapamohu pry zbory ŭradžaju.