U Jerevanie ŭ rajonie zachoplenaha 17 lipienia budynka pałka patrulna-pastavoj słužby čuvać stralanina. Paviedamlajecca pra hibiel adnaho palicejskaha.
«Słužačy vojskaŭ palicyi 30-hadovy Jura Tiepanasian byŭ zabity strełam snajpiera z terytoryi, jakaja znachodzicca pad kantrolem ŭzbrojenaj hrupoŭki. Aŭtamabil znachodziŭsia na adlehłaści kala 400 mietraŭ ad budynka palicejskaha pałka», — paviedamiŭ Interfaksu pres-sakratar palicyi Armienii Ašot Aharunian.
Za dźvie hadziny da hetaha skončyŭsia termin ultymatumu, pastaŭlenaha śpiecsłužbami ŭzbrojenaj hrupie.
U noč na subotu la zachoplenaha ŭčastka adbylisia sutyknieńni palicyi z demanstrantami, masavyja zatrymańni i pierastrełka. Paviedamlajecca ab paranienych z abodvuch bakoŭ.
***
17 lipienia hrupa ŭzbrojenych asob ŭvarvałasia na terytoryju patrulna-pastavoha pałka palicyi ŭ Jerevanie, prataraniŭšy hruzavikom žaleznuju bramu. Adzin palicejski pry hetym zahinuŭ, niekalki atrymali ranieńni.
Zachopniki patrabavali vyzvalić apazicyjnaha aktyvista Žyrajra Siefilana i inšych ludziej, jakich jany ličać palityčnymi viaźniami, a taksama adpravić u adstaŭku prezidenta Armienii.
Paźniej da budynka pryjšli niekalki tysiač pratestoŭcaŭ z partretami apazicyjnych palitykaŭ i zaklikami skinuć prezidenta Sierža Sarhsiana.
