Lehalnych kancertaŭ u Miensku Lavon Volski nie davaŭ bolš za dva hady — muzyka apošnim časam vystupaje albo na zakrytych viečarynach, albo na spantannych akcyjach — varta zhadać jahony kancert u padziemnym pierachodzie ci prosta ŭ poli ŭ mikrarajonie Sucharava. Na vystup muzyki na kancercie «Zaśpiavaj 3.0» mienskija ideolahi vydali hastrolnaje paśviedčańnie. Admysłova dziela takoj nahody Tuzin.fm skłaŭ kampilacyju, u jakuju ŭvajšli pieśni Lavona Volskaha, jakija byli prezentavanyja na Tuzin.fm, a taksama tyja tvory, jakija ŭvajšli ŭ apytańnie «100 najvialikšych biełaruskich piesień».
U hety viečar hledačoŭ taksama čakaje vystup hurta Leibonik, jaki pretenduje na pieramohu ŭ naminacyi «Biełaruski kaver». Uładalniki tytułu «Adkryćcio hodu» ŭ biełaruskaj muzycy (2014) pieraśpiavali akurat pieśniu Lavona Volskaha z časoŭ hurtu «Mroja» — «Ja rok-muzykant». «My abrali dla vykanańnia tvor, na jakim vyraśli sami i jaki šmat u čym dla nas źjaŭlajecca ŭzoram klasyčnaha biełaruskaha roku. Spadziajemsia, Lavon Arturavič nie pakryŭdzicca na našu volnuju interpretacyju», — kaža Siarhiej Bašłykievič, jaki admysłova da hetaj versii dapisaŭ svoj kuplet. Siarod najlepšych jaje nazvali siabry žurySiarhiej Bałachonaŭ i Vital Ryžkoŭ.
U kancercie taksama voźmie favaryt u naminacyi «Śpiavanaja paezija» Fiodar Žyvaleŭski, jaki pakłaŭ na muzyku vierš Źmitra Višniova «Taniec-fryk». «Muzyčnaja stylistyka pieśni — najbližejšaja da apošnich aŭtarskich piesień z novaha repertuaru majho hurta «Hołaja manaška», — raspaviadaje Fiodar. — Ideja treku — u raskryćci sučasnaj biełaruskaj paezii ad admysłoŭcaŭ litaraturnaha performansu dla šyrokaj aŭdytoryi». U liku najlepšych hetuju pieśniu nazvali siabry žury Ŭładź Lankievič i Aleh Chamienka.
Trecim finalistam, jaki vystupić u hety viečar budzie Viktar Łupasin — vykanaŭca ŭ aryhinalnym žanry, jaki jon sam vyznačaje jak «detanalny čyłaŭt». Jon trapiŭ u finał u naminacyi «Zamiežny pierakład» ź biełaruskim pieraasensavańniem «Bohemian Rhapsody» hurtu Queen. Pieśniu siarod najlepšych nazvali ŭ pryvatnaści Andrej Chadanovič i Hanna Jankuta.
Za ŭsich finalistaŭ konkursu možna taksama prahałasavać na sajcie Talaka.by, dzie idzie vyznačeńnie najlepšaha na mierkavańnie narodnaha žury.
Vieści kancert «Zaśpiavaj 3.0» budzie Aleh Chamienka. U prodažy tolki 80 kvitkoŭ — 20 miescaŭ za stolikami i 60 na tancplac.
UVAHA! U VYPADKU ZABARONY KANCERTU, NABYTY KVITOK BUDZIE DZIEJNIČAĆ JAK SERTYFIKAT NA PAKUPKU Ŭ KRAMIE SYMBAL.BY
19.08. Minsk, Chill Out (płošča Svabody, 4, unutrany dvoryk). 19.00—22.00. Lavon Volski + finalisty «Zaśpiavaj 3.0»: Leibonk, Fiodar Žyvaleŭski, Viktar Łupasin. Košt kvitkoŭ: 20 rub. (papiarednie, tancplac), 25 rub. (papiarednie, miesca za stolikam). Infa: +375 29 687-20-93.
