U Ženevie prachodzić 97‑ia sesija Mižnarodnaj kanferencyi pracy. Učora ŭ Švajcaryju vylecieła pradstaŭničaja aficyjnaja trochbakovaja delehacyja i staršynia Biełaruskaha kanhresu demakratyčnych prafsajuzaŭ Alaksandr Jarašuk.
Miarkujecca, što 5 červienia Kamitet pa normach i standartach MAP budzie abmiarkoŭvać biełaruskaje pytańnie.
Darečy, letaś aficyjnuju delehacyju ačolvali vice‑premjer Andrej Kabiakoŭ i namieśnica kiraŭnika prezydenckaj administracyi Natalla Piatkievič. Sioleta delehacyju ačolvaje ministar pracy Ŭładzimier Patupčyk, a ŭ jaje składzie — pradstaŭniki Minpracy, Federacyi prafsajuzaŭ Biełarusi i pradstaŭniki najmalnikaŭ. Načalnik Upraŭleńnia źniešnich suviaziaŭ i partnerskaj palityki Ministerstva pracy Ihar Staravojtaŭ udakładniaje:
«Heta nie hučyć, jak «biełaruskaje pytańnie». Heta hučyć, jak «Prymianieńnie ŭ Respublicy Biełaruś Kanvencyi MAP №87». 5 červienia Biełaruś razam ź jašče 20 — 25 krainami budzie davać spravazdaču ab mierach, źviazanych z prymianieńniem Kanvencyi 87 u Respublicy Biełaruś».
Staršynia Biełaruskaha kanhresu demakratyčnych prafsajuzaŭ Alaksandr Jarašuk ličyć, što ŭ Ženevie na surjoznym uzroŭni buduć abmiarkoŭvać sytuacyju ŭ Biełarusi. Siomy hod zapar razhladajecca biełaruskaja pytańnie, piać razoŭ krainu ŭnosili ŭ «specparahraf», adzin raz stvarali kamisiju pa raśśledavańni. Letaś Eŭraźviaz pazbaviŭ Biełaruś handlovych preferencyjaj, ale, na dumku Alaksandra Jarašuka:
«Stanovišča pryncypova nie pamianiałasia, i jano nia moža pamianiacca. Kaniečnie, usialakija kroki pa vykanańni rekamendacyjaŭ Mižnarodnaj arhanizacyi pracy (darečy, ich taksama 12) jość ni što inšaje, jak refarmavańnie palityčnaj systemy ŭ bok demakratyi. Siońniašni režym jašče nie daśpieŭ da takoha stanu, jon nie samazabojca, tym bolš i nie vialiki refarmatar. Kaniečnie, i sytuacyja z pravami prafsajuzaŭ u krainie nia moža pryncypova mianiacca ŭ lepšy bok».
Na dumku staršyni BKDP Alaksandra Jarašuka, razmova ŭ Ženevie budzie žorstkaj, jon nie vyklučaje, što Biełaruś i ŭ šosty raz zapar trapić u tak zvany «specparahraf». Da taho ž, ułady tak i nie pryniali Zakon ab prafsajuzach, jaki ŭ adpaviednaści z Ukazam prezydenta pavinien być pryniaty jašče viasnoj minułaha hodu. A Mižnarodnaja arhanizacyja pracy vyznačajecca svajoj pryncypovaj pazycyjaj, kaža Alaksandar Jarašuk:
«MAP rašuča nastojvaje na vykanańni svaich rekamendacyjaŭ i nie adstupaje. Bolš za toje, jon hatovy navat pajści na radykalnyja kroki — prymianieńnie parahrafa 33 Statutu MAP. Heta aznačaje zaklik da krainaŭ mižnarodnaj supolnaści prypynić usialakija stasunki z uradam Biełarusi. I pa‑druhoje, vielmi niepryjemnyja perspektyvy, jakija naprastki źviazanyja z handlovymi preferencyjami».
