U dačynieńniach Miensku z Maskvoj nieŭprykmiet vyśpiavaje napružanaść. Biełaruskaje kiraŭnictva rychtujecca da boju za tanny haz. Rasiejski ž bok vyłučaje svaje ŭmovy.
Dyspazycyja takaja. Naš urad zakładaje ŭ biudžet-2009 haz pa 140 dalaraŭ. Pra heta ŭ aŭtorak paviedamiŭ Łukašenku Sidorski. Matyvacyja: "Rasieja pieraniesła pierachod na roŭnadachodnyja z ekspartnymi ceny na haz unutry krainy na bolš poźni termin". Tamu, maŭlaŭ, i nam najchutčej što pašencić atrymać błakitnaje paliva sa źnižkaj.
Maskva ž prytrymlivajecca inšaj lohiki. Na dakład Sidorskaha svajmu šefu jana adreahavała zahałoŭkam na sajcie "Iźviestij" (vydańnie zaraz naležyć "Hazpromu"): "Biełaruś admaŭlajecca płacić za rasiejski haz napoŭnicu". U publikacyi nahadana: zhodna z čatyrochhadovym kantraktam cana hazu dla Biełarusi ŭ 2008, 2009 i 2010 hodach musić skłaści adpaviedna 67, 80 i 90% ad eŭrapiejskaj (minus transpartnyja vydatki i ekspartnaje myta). U pryvatnaści, u "Hazpromie" paćvierdzili ŭžo "namier ŭ nastupnym hodzie padniać canu pastaŭlanaha ŭ respubliku hazu do $200", zaznačajuć "Iźviestija".
Niaciažka zrabić vysnovu: paviedamleńni biełaruskich aficyjnych krynicaŭ pra toje, što na pasiedžańni Saŭminu sajuznaje dziaržavy 27 červienia "planujecca razhledzieć pytańni cenaŭtvareńnia na rasiejski haz dla Biełarusi ŭ 2009 hodzie", adlustroŭvajuć vyklučna chacieńnie našaha ŭradu. Dla Maskvy (a Saŭmin sajuznaje dziaržavy ciapier ŭznačalvaje, nahadaju, Pucin) nijakich takich pytańniaŭ niama: maŭlaŭ, padpisali pahadnieńnie ab pierachodzie na eŭrapiejskuju formułu, dyk niama čaho ciapier fincić!
Takim čynam, pad zasłonu hodu, a mo' i raniej, vielmi imavierny novy raŭnd abvastreńnia stasunkaŭ na enerhietyčnaj hlebie.
Intryhoŭny momant: u niemałym śpisie tych lideraŭ krain SND, ź jakimi ŭ Miadźviedzieva zaplanavanyja sustrečy na samicie ŭ Pieciarburhu 6 červienia (času zastałosia ź vierabjinuju dziubu), Łukašenka pakul što nie fihuruje. Pavodle Prychodźki, pamočnika prezydenta Rasiei, "pytańnie prapracoŭvajecca".
Nia nadta imavierna, što hetaja niapeŭnaść źviazanaja z padrychtoŭkaj niejkich praryŭnych rašeńniaŭ u dvuchbakovych dačynieńniach. Na chutkaciečnych, mituślivych niefarmalnych samitach SND surjoznyja pytańni nie vyrašajucca. Najchutčej što novy rasiejski prezydent prosta vytrymlivaje paŭzu, padkreślivaje adlehłaść. Dyj pieršy svoj vizit Miadźviedzieŭ zrabiŭ, jak vy viedajecie, nia ŭ Miensk, a ŭ Astanu. Karaciej, Maskva ŭsialak daje zrazumieć: niama taho, što rańš było…
ZY. U sieradu maskoŭskija "Viedomosti" napisali ab prahramie majučaha adbycca niefarmalnaha samitu SND pad źjedlivym zahałoŭkam "Łukašenka nie aktualny". Pavodle vydańnia, Rasieja vyłučyła ŭltymatum: abo adziny rubiel, abo darahija enerhanośbity.
