Fota Darji Burakinaj, Tut.by
Najlepšaja biełaruskaja tenisistka Viktoryja Azaranka praviała 25-26 žniŭnia ŭ Minsku treniravalny łahier dla junych spartsmienaŭ. U apošni dzień jana ŭdzialiła krychu času biełaruskim žurnalistam, padzialiłasia ŭražańniami ad kempa i adkazała na pytańni ab viartańni ŭ vialiki sport, hramadzianstvie dziciaci i vybary miesca naradžeńnia małoha.
«Pakul jašče rana mnie vyrašać, ale naradžeńnia dziciaci ŭ Biełarusi ŭ mianie, na žal, nie atrymajecca, ale hramadzianstva padvojnaje budzie abaviazkova», — skazała Viktoryja Azaranka.
Adkazvajučy na pytańnie pra svajo viartańnie ŭ vialiki sport, jana zaŭvažyła, što chacieła b užo zhulać na U.S. Open, jaki prachodzić kožny hod u kancy žniŭnia.
Azaranka zastałasia zadavolenaja, jak prajšoŭ treniravalny łahier. «Mianie paradavała, što ŭsio vielmi staralisia, prymali infarmacyju, jakuju im davali. Byli i ślozy, byli i radaści! Heta zaŭsiody na dziciačych turnirach prysutničaje i heta pryjemna».
Adnak, Viktoryja skazała, što nie hatovaja pracavać dziciačym trenieram. «Na poŭnuju mnie pakul ciažka pracavać. Ja ŭsio ž taki pakul jašče spartsmienka, ja dumaju, jak spartsmienka, a nie jak trenier».
Azaranka pryznałasia, što jana realizavała svaju dziciačuju maru: «Ja zaŭsiody chacieła, kab da nas niechta pryjechaŭ ź viadučych tenisistaŭ. Mnie zaŭsiody było pryjemna, što chtości pryjazdžaŭ na fjučarsy, na Kubak Devisa, na Kubak Fiederacyi. My zaŭsiody im padavali miačy. Było pryjemna znachodzicca pobač z suśvietnymi zorkami. Mnie zaŭsiody chaciełasia, kab dzieci adčuvali takuju padtrymku ad mianie. Dla mianie heta nie składana, a dzieciam heta pryjemna».
Viktoryja nie vyklučyła, što ŭ budučyni takija łahiery mohuć stać mižnarodnymi. «Taksama chaciełasia b raźvivać ich u rehijonach Biełarusi. Tenis treba raźvivać nie tolki ŭ stalicy, ale i ŭ inšych haradach».
Aceńvajučy ŭzrovień maładych biełaruskich tenisistak, takich jak Viera Łapko i Aryna Sabalenka, Viktoryja Azaranka zaŭvažyła, što im jašče jość kudy raści. «Patencyjał u ich jość, ale mnie nie chaciełasia b, kab zavastrali ŭvahu na junijorskich pieramohach, tamu što jany nie pryvodziać u prafiesijnym sporcie vielmi daloka. Važna, kab nie źnikaŭ hoład i imknieńnie da pieramoh».
Azaranka dadała, što jana davoli žorstka pahutaryła ź imi na Kubku Fiederacyj. «Maja zadača, jak lidara, kazać im praŭdu», - dadała Viktoryja.
Nahadajem, što ŭ lipieni Viktoryja Azaranka abviaściła na svajoj staroncy ŭ Facebook, što ŭ kancy hoda stanie mamaj.
