Abvinavačańnie pradjavili dvum supracoŭnikam DAI Kastryčnickaha rajonu Miensku. U dačynieńni da jašče dvuch milijacyjantaŭ kryminalnaja sprava spyniena z pryčyny adsutnaści ŭ ich dziejańniach składu złačynstva.
Kožny z šaści paciarpiełych padaŭ hramadzianski pazoŭ u dačynieńni da supracoŭnikaŭ DAI na sumu 50 młn rubloŭ u jakaści kampensacyi maralnaha ŭronu. Aproč taho, paciarpiełyja vystavili pazoŭ u pamiery 25 młn rubloŭ u jakaści kampensacyi materyjalnaha ŭronu, paviedamlaje BIEŁTA
Nahadajem, što 2 sakavika ŭviečary supracoŭniki DAI, kab zatrymać pjanoha Ramana Mienciuka, jaki lacieŭ na svaim «Falksvahienie‑Holf» z chutkaściu 160 km /h, nie dadumalisia da ničoha lepšaha, jak vystavić na 8-m kilametry trasy Miensk — Mikaševičy (la vioski Sieńnica) žyvy ščyt z aŭtamabilaŭ, u jakich siadzieli pasažyry ź dziećmi. U vyniku sutyknieńnia mašyny Mienciuka ź impravizavanym žyvym ščytom traŭmy atrymali niekalki čałaviek, a mašyny śmiarotnikaŭ pa voli DAI byli paškodžanyja.
Sprava atrymała rozhałas tolki praz dva tydni Tym časam napačatku supracoŭniki DAI admaŭlali niepravamiernaść svaich dziejańniaŭ. Namieśnik upraŭleńnia Dziaržaŭtainspekcyi MUS pałkoŭnik Ihar Vanicki navat zajaviŭ na admysłovym bryfinhu, što sutyknieńnie aŭtamabila «Falksvahien Holf», za rulom jakoha jechaŭ Mianciuk, z mašynami ludziej, što jechali ŭ Miensk, a taksama aŭtamabilami supracoŭnikaŭ DAI, adbyłosia ŭ vyniku taho, što "kiroŭcy hramadzianskich aŭto, spyniŭšy svaje transpartnyja srodki, niapravilna zrazumieli žest supracoŭnika DAI, jaki patrabavaŭ praciahvać ruch u kirunku Miensku".
U svaju čarhu, Raman Mianciuk, u dačynieńni da jakoha była zaviedziena kryminalnaja sprava, pakinuŭ Biełaruś i abvieščany ŭ vyšuk.
Pakazalna taksama, što žyvy ščyt, zładžany 2 sakavika na trasie Miensk - Mikaševičy, zusim nie ŭnikalny vypadak u historyi Biełarusi. Prykładam, analahičny ščyt byŭ zrobleny 7 kastryčnika 2007 h. na MKAD.
