Fiłosaf Uładzimir Padhoł — kandydat ad Partyi BNF. U efiry «Biełaruś-3» jon vystupaŭ… u kamizelcy «Kula dla prezidenta». A naprykancy nadzieŭ navat šlem.
Prychilniki Padhoła vykładajuć u internet vystup kandydata.
U dobraj jakaści videa možna ŭbačyć tut.
Pra što kazaŭ Padhoł?
«Nam nieabchodna admianić usie zakony, jakija stvaryli Sajuznaja dziaržava, ADKB i JEAES, roznym kamisijam jakich delehavany kanstytucyjnyja paŭnamoctvy. Choć pa Kanstytucyi suvierenitet naležyć tolki nam, hramadzianam Respubliki Biełaruś», — cytuje Padhoła BiełaPAN.
Jon zajaviŭ, što biełarusy, prodki jakich razhramili kryžakoŭ i hitleraŭski fašyzm, «pavinny žyć lepš, čym niemcy ŭ pieramožanaj nami Hiermanii».
Pry hetym kandydat adznačyŭ, što biełarusy žyvuć «jak žabraki», tamu što ŭ krainy «šmat vorahaŭ». Jon zaklikaŭ zakryć miežy «ad handlaroŭ zbrojaj», pry bieśpieraškodnym praniknieńni jakoha Biełaruś «moža pieratvarycca ŭ kryvavy Danbas», a taksama ad narkahandlaroŭ, jakija «praz adkrytuju miažu z Rasijaj» pastaŭlajuć narkotyki. «Nieabchodna ŭvodzić narkakantrol i kantrol za pieramiaščeńniem zbroi i narkatyčnych rečyvaŭ», — padkreśliŭ kandydat u deputaty.
Taksama Padhoł nazvaŭ «prychavanych vorahaŭ» — staršyniu Centrvybarkama Lidziju Jarmošynu, jakaja «zajaviła, što kandydaty ŭ deputaty parłamienta pavinny zajmacca tolki prablemami svajoj akruhi i nie zajmacca hłabalnymi palityčnymi prablemami». Pry hetym, skazaŭ pramoŭca, u adpaviednaści z Kanstytucyjaj mienavita deputaty parłamienta vyznačajuć dziaržaŭnuju źniešniuju i ŭnutranuju palityku.
«Nam treba budavać svoj dom-chram. Davajcie pad chryścijanskimi bieł-čyrvona-biełymi kvietkami i hierbam» Pahonia «razam ratavać, abaraniać, budavać naš dom — Biełaruś», — zaklikaŭ Padhoł.
