Naturalizavanaja amierykanskaja spartyŭnaja himnastka Kajli Dyksan, jakaja pradstaŭlała Biełaruś na Alimpijadzie-2016, pryjechała na Hulni z traŭmaj. Pra heta 30 žniŭnia ŭ Minsku na pres-kanfierencyi, pryśviečanaj padviadzieńniu vynikaŭ Alimpijady ŭ Rya-de-Žaniejra, paviedamiŭ pieršy namieśnik ministra sportu i turyzmu, šef misii biełaruskaj delehacyi Alaksandr Hahijeŭ.
Reuters
«Ab traŭmie himnastki ŭsie daviedalisia tolki na Alimpijadzie. Jana prylatała tudy z ZŠA, dzie i rychtavałasia. U Biełarusi jana nie była. Kali Dyksan prylacieła, našy miedyki jaje ahledzieli, źjavilisia padazreńni. Zrabili abśledavańnie, jakoje vyjaviła treščynu ŭ stapie. Usio, što možna było padlačyć, padlačyli», — skazaŭ namieśnik ministra.
U kvalifikacyi mnahaborja Dyksan pakazała pieradapošni, 58-my vynik.
Na pytańnie, ci dapuščalnyja takija situacyi, kali spartsmien pryjazdžaje z traŭmaj pradstaŭlać krainu i pry hetym navat ni razu nie pakazvajecca ŭ joj, Hahijeŭ adkazaŭ: «My zrabili vysnovy. Dumaju, tut my pajšli na povadzie ŭ ludziej, jakija ŭsio heta prapanoŭvali, uličvajučy biezvychodnaść u našaj spartyŭnaj himnastycy. Ciapier bačym, što tut u niejkaj stupieni pamylilisia. Kali čałaviek choča vystupać za našu krainu, jon pavinien znachodzicca ŭ joj, chacia b zaklučnyja etapy padrychtoŭki, kab my razumieli, kaho my viaziem».
Havoračy ŭ cełym ab naturalizacyi zamiežnych spartsmienaŭ, čynoŭnik adznačyŭ, što źjaŭlajecca prychilnikam, «kab maksimalna vystupali biełarusy», ale ŭ toj ža čas jon nie bačyć ničoha drennaha ŭ pryciahnieńni zamiežnikaŭ.
Na pres-kanfierencyi była padniataja jašče adna skandalnaja tema — dyskvalifikacyja z-za dopinhu taekvandysta Armana-Maršała Siły, jaki źjaŭlaŭsia adnym z hałoŭnych pretendentaŭ na pieramohu ŭ Rya ŭ svajoj vahavoj katehoryi.
«Detalaŭ pakul niama, idzie rasśledavańnie. Heta byŭ udar nam u śpinu. Nikoha pakul nie chaču vinavacić. Siońnia ŭ adpaviednaści z antydopinhavymi praviłami piersanalnuju adkaznaść spartsmien niasie za ŭsio, što traplaje ŭ jaho arhanizm. Navat kali heta było pa chałatnaści, nichto abvinavačańniaŭ nie zdymaje. Kancentracyja mieldoniju — 3.100. Heta vielmi vysokaja kancentracyja», — skazaŭ Hahijeŭ.
Pavodle jaho słoŭ, trenier spartsmiena i sam atlet zapeŭnivajuć, što nie vykarystoŭvali preparat. «Ja schilny im vieryć, pakolki heta nie toj vid sportu, u jakim mieldonij mocna dapamahaŭ by navat u płanie adnaŭleńnia», — zajaviŭ namieśnik ministra.
