Padrychtavany prajekt ukaza prezidenta, jaki praduhledžvaje dyfierencyjavanaje pavyšeńnie pamieru dapamohi pa biespracoŭi, paviedamlaje pres-słužba Fiederacyi prafsajuzaŭ Biełarusi.
Niapoŭnaja zaniataść i miery sacyjalnaj padtrymki biespracoŭnych abmiarkoŭvalisia na hetym tydni ŭ štab-kvatery fiederacyi ŭ Minsku. Jak paviedamlaje pres-słužba FPB, na pasiadžeńni razhladalisia vyniki vykanańnia ŭ pieršym paŭhodździ normaŭ hienieralnaha pahadnieńnia, padpisanaha pamiž uradam i respublikanskimi abjadnańniami najmalnikaŭ i prafsajuzaŭ na 2016—2018 hady.
Pradstaŭniki fiederacyi adznačyli, što vielmi nizkaj zastajecca dapamoha pa biespracoŭi — jaho siaredni pamier u červieni skłaŭ 268,8 tys. niedaminavanych rubloŭ (pryblizna 13 dołaraŭ u ekvivalencie). «Hienieralnym pahadnieńniem zamacavanaje abaviazacielstva bakoŭ prymać miery, skiravanyja na pavyšeńnie dapamohi pa biespracoŭi da ŭzroŭniu biudžetu pražytačnaha minimumu», — cytuje pres-słužba FPB načalnika hałoŭnaha ŭpraŭleńnia sacyjalnaha partniorstva i pracoŭnych adnosin aparatu savieta Fiederacyi prafsajuzaŭ Maksima Karšakieviča.
Da hetaha času, adznačyŭ jon, Ministerstva pracy i sacyjalnaj abarony raspracavała i nakiravała va ŭrad prajekt ukaza prezidenta «Ab dadatkovych mierach pa zabieśpiačeńni sacyjalnaj padtrymki niekatorych katehoryj biespracoŭnych». Dakumient praduhledžvaje dyfierencyjavanaje pavyšeńnie dapamohi pa biespracoŭi i stypiendyj.
Pavodle infarmacyi fiederacyi, padčas dapracoŭki prajekta ŭkaza była ŭličanaja pazicyja prafsajuzaŭ pa dvuch sprečnych pytańniach.
«Adnak prapanavanaje FPB maksimalnaje nabližeńnie da biudžetu pražytačnaha minimumu pamieru dapamoh i stypiendyj pa biespracoŭi dla asob, jakija byli zvolnienyja z-za ŭvažlivych pryčyn, nie źviazanych sa skaračeńniem kolkaści i štatu rabotnikaŭ, na žal, nie znajšło adlustravańnie ŭ prajekcie ŭkaza», — paviedamlaje pres-słužba.
Pavodle acenak Jeŭrazijskaha banka raźvićcia, jaki źjaŭlajecca asnoŭnym kredytoram Biełarusi, zališniaja zaniataść u ajčynnym siektary dziaržpradpryjemstvaŭ składaje 20%. Zhodna z kredytnaj prahramaj, jakuju ŭrad padpisaŭ u sakaviku hetaha hoda ź JEABR, Minsk pavinien pryniać miery sacyjalnaj abarony nasielnictva na vypadak rostu biespracoŭja.
