U Biełarusi za hetaje leta patanuli 187 čałaviek, ź ich 20 dziaciej. Pra heta paviedamiŭ viadučy śpiecyjalist respublikanskaha tavarystva ratavańnia na vadzie Aleh Barazna.
«Pavodle apieratyŭnych dadzienych, z 1 červienia pa 31 žniŭnia ŭ respublicy patanuli 187 čałaviek, ź ich 20 niepaŭnahadovych. Niepasredna pry kupańni zahinuŭ 101 čałaviek, u tym liku 10 niepaŭnaletnich», — skazaŭ Aleh Barazna.
Asnoŭnymi pryčynami hibieli ludziej na vadzie, pa słovach viadučaha śpiecyjalista, stała kupańnie ŭ niećviarozym stanie, nievykanańnie praviłaŭ pavodzin na vadzie, rybnaja łoŭla z płavalnych srodkaŭ biez vyratavalnych kamizelek, płavańnie na zabaronienych pradmietach, a taksama pakidańnie dziaciej biez nahladu darosłych.
Usiaho za letni pieryjad śpiecyjalisty tavarystva vyratavali 261 čałavieka, u tym liku 85 niepaŭnaletnich.
Ratavalniki ŭ čarhovy raz nahadvajuć, što kupacca ŭ stanie ałkaholnaha apjanieńnia patencyjna niebiaśpiečna. Akramia taho, z-za roźnicy tempieratury vady i pavietra ŭ vadajom zachodić treba pastupova, kab paźbiehnuć kurčaŭ abo sardečnaha prystupu (asabliva ŭ ludziej, jakija pakutujuć na sardečna-sasudzistyja zachvorvańni). Zabaroniena kupacca ŭ nieprystasavanych dla hetaha miescach, a taksama skakać u vadu z dambaŭ, pryčałaŭ, tarzanak, inšych abjektaŭ, jakija ŭzvyšajucca nad vadoj, płavać na nadzimanych matracach, aŭtamabilnych kamierach i samarobnych płytach.
