«Nam treba, kab minčanie viedali, u jakim napramku budzie raźvivacca horad, i bačyli heta», — skazaŭ Łukašenka.
Jak dałažyli kiraŭniku krainy, Minski harvykankam raspracavaŭ novy hienieralny płan horada. Im, u pryvatnaści, praduhledžvajecca stabilizacyja kolkaści nasielnictva stalicy na ŭzroŭni 2 miljonaŭ čałaviek, zachoŭvajucca ŭsie pryharadnyja sielhasuhodździ. Płanujecca, što ŭ haradskija miežy ŭvojdzie tolki lasny masiŭ z paŭdniova-ŭschodniaha boku Minskaha mora — heta amal 2 tysiačy hiektaraŭ lesaparkavych terytoryj, paviedamlaje BIEŁTA.
«Heta zakon: na ziemli sielhaspryznačeńnia — tam, dzie pavinien raści chleb, — vy nie raźličvajcie. Heta pravilna nie tolki z punktu hledžańnia zachavańnia ziamli. Minsk pavinien być prastornym sam pa sabie i dychać. Kali my Minsk pa kalcy jašče zabudujem vyšynnymi damami i inšym, horad zadychniecca», — padkreśliŭ Łukašenka.
Staršynia kamiteta architektury i horadabudaŭnictva Minskaha harvykankama, hałoŭny architektar Minska Pavieł Łučynovič adznačyŭ, što dziejučym hienieralnym płanam praduhledžvałasia pavieličeńnie płoščy horada da 54 tysiač hiektaraŭ. U novym hienieralnym płanie ad hetaj idei admovilisia, płošča Minska budzie ŭ asnoŭnym zachavana ŭ miežach MKAD. Pry hetym horadabudaŭniki raźličvajuć na pryrost nasielnictva da 2030 hoda ŭ kolkaści 100-120 tysiač čałaviek. «My ŭličvajem heta ŭ našaj rabocie i hety pryrost chočam pieraraźmierkavać u haradach-spadarožnikach», — skazaŭ hałoŭny architektar stalicy.
Tak, u Minsku płanujecca aptymizavać abjomy žyllovaha budaŭnictva. U adpaviednaści z hienieralnym płanam budaŭnictva sacyjalna zapatrabavanaha žylla pradoŭžycca na svabodnych terytoryjach. Kompleksy žyłoj zabudovy buduć stvaracca na vytvorčych terytoryjach, jakija buduć vyzvalacca, a taksama na terytoryjach znosu siadzibnaj i małapaviarchovaj zabudovy ź vialikim fizičnym i maralnym znosam.
Zapłanavana budaŭnictva novych haradskich i rajonnych parkaŭ na płoščy bolš jak 2 tysiačy hiektaraŭ.
U roznych miaścinach horada buduć uviedzieny ŭ stroj sučasnyja kompleksy z rekreacyjnaj, ofisnaj, spartyŭnaj, žyllovaj infrastrukturaj. Dadatkovaje raźvićcio atrymaje transpartnaja sietka Minska, u tym liku mietrapaliten. U płanach horadabudaŭnikoŭ zastałosia taksama stvareńnie i dobraŭparadkavańnie dadatkovych aŭtastajanak, što pavinna razhruzić vulicy stalicy ad lišniaha transpartu.
Što datyčycca vytvorčaha składnika, to ŭ stalicy reziervujucca asobnyja terytoryi dla stvareńnia vytvorča-inviestycyjnych placovak, raźvićcia technaparkaŭ, nievialikich vytvorčaściaŭ. Masavaje žyllovaje budaŭnictva minułyja hady ŭ zachodnim i paŭdniovym siektary Minska pryviali da taho, što ŭ hetych rajonach uźnik deficyt rabočych miescaŭ u paraŭnańni z centram horada. Tamu ŭ novym hienieralnym płanie važnaja rola advodzicca raźvićciu i transfarmacyi vytvorčych placovak. Tolki sioleta płanujecca stvaryć kala 40 novych vytvorčych placovak z 10 tysiačami rabočych miescaŭ.
