Vialikaja panda bolš nie znachodzicca pad pahrozaj źniknieńnia, a papulacyja pandaŭ raście.
Getty
Mižnarodny sajuz achovy pryrody i pryrodnych resursaŭ (ICUN) źmianiŭ status pandy ŭ Čyrvonaj knizie z «jaki znachodzicca pad pahrozaj» na «jaki znachodzicca va ŭraźlivym stanoviščy».
Pryčynaj źmieny statusu staŭ rost papulacyi pandaŭ u Kitai.
U krainie vialikija pandy ličacca nacyjanalnym simvałam. Ułady Kitaja zmahajucca za toje, kab zachavać ich.
U vyniku apošnija dadzienyja kažuć pra toje, što papulacyja darosłych pandaŭ naličvaje 1 864 žyvioł. Dakładnych dadzienych pa kolkaści dzicianiat pandaŭ niama, ale ich kolkaść aceńvajecca ŭ 2 060.
U dakładzie ICUN havorycca, što skaračeńnie kolkaści žyvioł było prypynienaje, a papulacyja pačała raści. U arhanizacyi adznačyli, što vysiłki ŭładaŭ Kitaja pa zachavańni pandaŭ akazalisia efiektyŭnymi.
Tym nie mienš, hetyja palapšeńni mohuć akazacca karotkaterminovymi, papiaredžvajuć ekołahi. Z-za hłabalnaha paciapleńnia ŭ bližejšyja 80 hadoŭ budzie źniščana bolš za tracinu bambukavych zaraśnikaŭ, dzie žyvuć pandy. Pavodle prahnozaŭ, heta pryviadzie da skaračeńnia papulacyi pandaŭ, a taksama źviadzie na ništo ŭsie vysiłki ŭładaŭ Kitaja pa zachavańni vidu. Kab zachavać pandaŭ, treba prymianiać miery pa abaronie lasoŭ, rajać ekołahi.
Adnačasova z vyklučeńniem vialikaj pandy sa śpisu žyvioł, jakija akazalisia na miažy źniknieńnia, u jaho trapiła ŭschodniaja haryła — heta najbujniejšy ŭ śviecie prymat. Usiaho ŭ śviecie zastałosia kala 5 tysiač asobin uschodniaj haryły. Asnoŭnaj pryčynaj źniknieńnia stała nielehalnaje palavańnie.
Pad pahrozaj źniknieńnia sioleta taksama akazalisia šympanze i karlikavyja šympanze banoba.
Čyrvonaja kniha ŭklučaje 82 954 vidy žyvioł i raślin. Amal treć ź ich — 23 928 — znachodzicca na miažy źniknieńnia.