22 kastryčnika projdzie kancert troch pieramožcaŭ konkursu pry ŭdziele admysłovych haściej — hurtu Navi. Kvitki na tancplac užo možna nabyć pa 6 rubloŭ.
U vialikim kancercie, jaki projdzie ŭ klubie «Coyote» voźmuć udzieł pieramožcy ŭ troch naminacyjach «Zaśpiavaj 3.0». Paulinevystupić poŭnym składam z prahramaj najlepšych hitoŭ. «Prahučać užo viadomyja niekatorym słuchačam pieśni, ale ŭ jakasna novym hučańni, — kaža śpiavačka. — My praciahvajem pošuki novaha i aryhinalnaha navat va ŭžo isnujučym materyjale, a taksama pracujem nad padačaj samich kampazycyj. Abaviazkova prahučyć pieśnia, jakaja pryniesła nam pieramohu ŭ «Zaśpiavaj 3.0»».
Leibonik naadvarot rychtuje bolš kamernuju prahramu. «My padrychtujem maksymalna «rok-muzykantaŭski» bajavy set amal biez klavišna-dudačnych azdableńniaŭ. Da taho ž Leibonik zaśpiavaje na novaj dla siabie movie. A naohuł planujem u hety viečar aktyŭna śviatkavać pieramohu dy vinšavać pieramožcaŭ inšych naminacyj, zaprašajem siabroŭ dałučycca!»
Tryjo Dzimy Nikanoviča, Voli Saciuk i Mikity Najdzionava, jakoje ŭtvaryłasia admysłova dla ŭdziełu ŭ «Zaśpiavaj 3.0», vyrašyła praciahnuć tvorčuju dziejnaść i nadalej. «My adčuli, što našy hałasy spałučajucca ŭ niejkaj niezvyčajnaj harmonii. A heta kaža pra toje, što možna dalej śpiavać razam», — zaŭvažaje Dźmitry Nikanovič.
Hościem viečaryny budzie hurt Navi, pieramožca konkursu «Zaśpiavaj» u 2015 hodzie, jaki vystupić z hadzinnym kancertam. «My z pryjemnaściu zhadvajem momant pieramohi na konkursie «Zaśpiavaj 2.0». Cudoŭna toje, što heta historyja majepraciah. Pieśniu «Płakali vietry» my vykonvajem i ciapier. Z radaściu padtrymajem hała-kancert, dzie abaviazkova syhrajem našu pieravažna biełaruskamoŭnuju prahramu», — kaža Arciom Łukjanienka.
Kvitki na kancert pastupili ŭ prodaž pa 10-15 rubloŭ, ale nieŭzabavie na rašeńnie arhanizataraŭ košt byŭ istotna źnižany. «Placoŭka zdolnaja źmiaścić davoli vialikuju kolkaść słuchačoŭ — da 400 čałaviek, tamu my vyrašyli zrabić uvachod maksymalna dastupnym, kab jak maha bolš ludziej pačuli pieramožcaŭ našaha konkursu, bo moža być jakraz za imi budučynia biełaruskaj muzyki», — kaža pradusar konkursu Siarhiej Budkin.
***
22.10. Miensk. Bar «Coyote» (praspekt Niezaležnaści, 117a). 19:00—22:00. Kancert pieramožcaŭ konkursu «Zaśpiavaj 3.0»: Pauline, Leibonik, Dźmitry Nikanovič&Volha Saciuk&Mikita Najdzionaŭ. Pry ŭdziele hurta Navi. Košt kvitkoŭ: 6 rub.(tancplac), 10 rub. (stolik) — papiarednie, 10 rub. (tancplac), 15 rub. (stolik) — u dzień. Infa: +375 29 687-20-93.
