Vystava «Koń u palito» minskaha mastaka Rusłana Vaškieviča adkryłasia 17 kastryčnika ŭ bresckim handlovym centry «Miljonny».
Ekspazicyja była stvoranaja dla miascovaha muzieja «Vyratavanyja mastackija kaštoŭnaści». Heta — ekskluziŭny prajekt kamandy minskich aŭtaraŭ. Adnak za try dni da adkryćcia vystavy kiraŭnictva muzieja zabaraniła na svajoj terytoryi praviadzieńnie vystavy ŭ tym vyhladzie, u jakim płanavaŭ mastak, zajaviŭšy, što pres-reliz ab vystavie zanadta ahresiŭny. Vaškievič ličyć, što rašeńnie zabaranić vystavu prymaŭ nie dyrektar muzieja, pakolki prajekt papiarednie byŭ abmierkavany i ŭzhodnieny.
Pres-reliz mieŭ nastupny źmiest: «Chto-chto? Inkohnita! Prajekt Rusłana Vaškieviča «Koń u palito» — heta pošuk zvarotnaj suviazi praz parušeńnie miežaŭ muzieja pahraničnaha horada z dapamohaj niesankcyjanavanych mietadaŭ ekspanavańnia. Prałom u biaśpiecy — voś tyja dźviery, praź jakija źjaŭlajecca Koń u palito. I, jak pakazvaje praktyka, uvachodzić jon u absalutna lubuju prastoru dziakujučy svajoj šmatabličnaści. Jon nie biare hanararu, a ŭ svaich unutranych kišeniach prynosić baton z napilnikam i hłytok nieabchodnaha śviežaha pavietra».
U vyniku kamanda Rusłana Vaškieviča pieraniesła vystavu ŭ zvyčajny handlovy centr na vulicy Savieckaj.
U samym centry ekspazicyi znachodzicca napoŭnienaja ałkaholem truna, taksama možna ŭbačyć karciny, instalacyi, knižny stełaž, na jakim knihi sabranyja takim čynam, što na ich vokładkach źjaŭlajucca malunki aholenych žančyn; stary chaładzilnik, u jakim ruka ź piarścionkam.
«Heta mastacki prajekt pra miežy, kantrabandu, stvorany dla pahraničnaha horada. Hetaj idejaj kantrolu nad miežami ja i byŭ natchniony, — zajaviŭ BiełaPAN Vaškievič. — Siońniašniaje mastactva niemahčyma bieź pierachodu miežaŭ. Sam muziej mnie zdaŭsia dziŭnym miescam, heta muziej ekspanataŭ, kanfiskavanych na miažy, na mytni — heta kalekcyja ikon, karcin. U kožnuju zału ja mierkavaŭ pastavić pa adnym abjekcie, jakija b pracavali, jak lampačka zapalvańnia dla aktyŭnaha maładoha hledača, mieŭsia na ŭvazie interaktyŭ. U apošni momant hetaha nie zdaryłasia».
Vaškievič ličyć, što kiraŭnictva muzieja prosta spałochałasia ŭłasnaj advahi. «Prajekt užo jechaŭ u Brest, kali muziej daŭ zadni chod. U vyniku pryjšłosia šukać pamiaškańnie, i ŭsio atrymałasia. Prajekt rychtavaŭsia hod, ale pierad samym adkryćciom dyrektar muzieja skazała, što prajekt moža adbycca za vylikam pałovy abjektaŭ. Heta stała b zusim biazzubaj dziciačaj vystavaj, i ad jaje admoviŭsia ŭžo ja», — skazaŭ mastak.
«Prajekt Rusłana Vaškieviča vielmi cikavy, u im mastak sprabuje hulać ź vidavočnymi ŭ našym žyćci rečami: z paniaćciem miažy, z paniaćciem kulturnaj industryi i paniaćciem kulturnaj kanfiskacyi, sprabuje razabracca z našymi adnosinami z kulturnymi normami i kanonami. Pry hetym mastak stavicca da hetaha iranična, časam navat cynična», — acharaktaryzavaŭ vystavu kulturołah Maksim Žbankoŭ.
Dyrektar muzieja «Vyratavanyja mastackija kaštoŭnaści» Iryna Taryma tak prakamientavała admienu ekspazicyi: «Vystava nie adpaviadaje farmatu našaha muzieja. Chaciełasia, kab aŭtar jašče papracavaŭ i prapanavaŭ inšuju vystavu. Hetaja nam nie padychodzić».
Rusłan Vaškievič — biełaruski mastak, pradstaŭnik kanceptualnaha mastactva, člen Biełaruskaha sajuza mastakoŭ i Citie Internationale des Arts (paryžskaja mižnarodnaja rezidencyja dla mastakoŭ). Jaho piersanalnyja vystavy prachodzili ŭ Minsku, Amsterdamie, Hranadzie, Kijevie, Maskvie, Paryžy, Rymie, Strasburhu, Talinie, Čykaha i inšych haradach. Jaho pracy pradstaŭlenyja ŭ kalekcyjach Muzieja sučasnaha mastactva (Minsk), Nacyjanalnaha mastackaha muzieja (Minsk), Muzieja sučasnaha ruskaha mastactva (Ńju-Jork), Muzieja novaha mastactva (Piarnu) i pryvatnych kalekcyjach.
Vystava «Koń u palito» budzie pracavać da 24 kastryčnika.
