Paśla praciahłaj baraćby žychary damahlisia admieny budaŭnictva druhoha 19-paviarchovaha doma na skryžavańni vulic Vaśniacova i Plachanava ŭ Minsku, paviedamiŭ kaardynatar hramadskaha ruchu «Hienpłan — dla minčan!» Dzianis Kobrusieŭ.
Z 2014 hoda žychary Zachodniaha pasiołka vystupali suprać budaŭnictva dvuch šmatpaviarchovak. Jany adznačali, što vyšynnyja damy spryjajuć zabrudžvańniu pavietra ŭ rajonie, i prasili anulavać rašeńnie Minharvykankama ab davańni firmie «Atłant-M Bud» ziamielnaha ŭčastka. Na dumku žycharoŭ, ekśpiertnyja zaklučeńni RUP «Hałoŭdziaržbudekśpiertyza» pa ŭźviadzieńni abjektaŭ vydadzienyja z parušeńniem ustanoŭlenaha zakanadaŭstvam paradku, a budaŭnictva ŭzhodnienaje nasupierak rehłamientam hienieralnaha płana Minska i detalovamu płanu zabudovy rajona. Žychary pakazvali i na toje, što zamiest zaćvierdžanaha prajektam 9-paviarchovaha doma ŭźviedzieny 19-paviarchovy.
«Učora i siońnia kampanija-zabudoŭščyk demantuje budaŭničuju placoŭku. Usio ž taki byli pryznanyja šmatlikija parušeńni, pravierku viadzie prakuratura. Praŭda, na ŭsie dakumienty jana pastaviła hryf «Dla słužbovaha karystańnia», — adznačyŭ Kobrusieŭ.
Pavodle jaho słoŭ, zabudoŭščyk paviedamiŭ inicyjatyŭnaj hrupie žycharoŭ, što jamu nie praciahnuty akt vybaru ziamielnaha ŭčastka i tamu jany zhortvajucca. «Ź pieršym ŭžo pabudavanym domam taksama jość prablemy. Jon, pavodle našych źviestak, pryznany samabudam, i ŭładalniki kvater piataha paviercha i vyšejšych nie mohuć atrymać techpašparty. Situacyja z zasialeńniem pakul vyrašajecca», — skazaŭ aktyvist.
Jon padkreśliŭ, što zhodna ź niadaŭna zaćvierdžanym karektavańniem hienpłana Minska na hetaj terytoryi mahčymaje budaŭnictva abjektaŭ vyšynioj nie bolšaj za 15 mietraŭ.
«Spynieńnie budaŭnictva žychary ŭsprymajuć pazityŭna jak dla siabie, tak i dla Minska. My ŭsie radujemsia, tamu što damahlisia pośpiechu paśla šmathadovych namahańniaŭ pa pryznańni parušeńniaŭ. U rešcie rešt hetuju budoŭlu zharnuli. Heta pakazvaje, što navat u samych bieznadziejnych situacyjach, navat kali zabudoŭščyk upłyvovy, nie treba zdavacca, treba praciahvać kampanii i dakazvać svaju praŭdu», — skazaŭ aktyvist.
